खाडी मुलुक जान लागेका महिलालाई फर्काइयो

फरक धार

२४ साउन २०७५, बिहीबार

बाँके- अवैध रूपमा भारत हुँदै तेस्रो मुलुक जान लागेका १६ नेपाली महिलालाई भारतको नयाँदिल्लीबाट नेपाल फर्काइएको छ ।

खाडी मुलुक जान लागेका ती महिलालाई नेपाली राजदूतावासको समन्वयमा भारतीय महिला आयोग, बनारस प्रहरी तथा रेस्क्यु फाउन्डेसन नामक संस्थाको सहयोगमा उद्धार गरिएको माइती नेपाल नेपालगन्ज शाखाका संयोजक केशव कोइरालाले जानकारी दिए ।

उनीहरूलाई भारतीय बाटो हुँदै अवैध रूपमा खाडी मुलक लैजान लागेको गोप्य सूचनाका आधारमा उद्धार गर्न सफल भएको उहाँले कोइरालाले बताए ।

संयोजक कोइरालाका अनुसार खाडी मुलुक जान लागेका ती महिलालाई नयाँ दिल्लीको मैदानगढी क्षेत्रका होटलमा छापा मारेर उद्धार गरिएको थियो । मध्यपश्चिम क्षेत्रमा घर भएका महिलालाई नेपालगन्जमा राखिएको छ भने अन्य जिल्लामा घर भएकालाई नजिकको माइती नेपालका सेल्टरमा राखिएको छ ।

उद्धार गरिएकामा दाङ, बाँके, दैलेख, पाल्पा, नवलपरासी, रूपन्देही, मोरङ, झापालगायत जिल्लाका महिला छन् । ‘नेपालगन्ज नजिकका महिलालाई यही राखेर परिवारसँग पुनर्मिलन गराइने तयारी छ,’ उनले भने, ‘कतिपय महिलाका परिवार नेपालगन्ज आइसक्नुभएको छ, कतिपय बाटोमै आउँदै गरेको जानकारी प्राप्त भएको छ ।’

ती महिलाले आफूहरू स्वेच्छिक रूपमा भारत हुँदै खाडी मुलुक जान लागेको माइती नेपालसमक्ष बयान दिएका छन् । नेपालको बाटो भएर खाडी मुलुक जान सरकारले प्रतिबन्ध लगाएपछि आफूहरू भारत भएर त्यसतर्फ जान लागेको प्रतिक्रिया उनीहरूले दिएका हुन् ।

 
प्रतिक्रिया दिनुहोस

फरक धारका अन्य समाचार