प्रतिनिधिसभातर्फ पर्साको चार निर्वाचन क्षेत्रमध्ये तीनवटाको नतिजा सार्वजनिक भइसकेको छ । मतपरिणामअनुसार दुईवटामा कांग्रेसका उम्मेदवार निर्वाचित भएका छन् भने क्षेत्र नम्बर ३ मा पनि कांग्रेसकै उम्मेदवारले अग्रता कायम गरेका छन् ।
पर्साको निर्वाचन क्षेत्र नम्बर–१ मा भने जनता समाजवादी पार्टीका नेता प्रदीप यादवले खाता खोल्न सफल भएका छन् । प्रदीपले २२ हजार ५३७ मत ल्याउँदै निर्वाचित भएका छन् । उनका निकटतम प्रतिद्वन्द्वी स्वतन्त्र उम्मेदवार अजय कुमार द्विवेदीले २० हजार ९१७ मत ल्याउँदा राप्रपाका किरणमान डंगोलले २ हजार ६५९ मत ल्याएका छन् ।
त्यस्तै, निर्वाचन क्षेत्र नम्बर–२ मा कांग्रेसका अजयकुमार चौरसिया भारी मतान्तरले निर्वाचित भएका छन् । चौरसियाले जनता समाजवादी पार्टीका सुरेन्द्र कुर्मीलाई ६ हजार ६ मतको फराकिलो अन्तरले पराजित गरेका छन् । चौरसियाले २८ हजार ४५१ मत ल्याएका छन् भने कुर्मीले २२ हजार ४४५ मत ल्याए ।
चौरसिया तेस्रोपटक सांसदमा निर्वाचित भएका छन् । २०५६ र २०६४ को निर्वाचनमा निर्वाचित चौरसिया २०५८ मा सहायक राज्यमन्त्री समेत बनेका थिए ।
उता, पर्सा–३ मा पछिल्लो मतपरिणामअनुसार नेपाली कांग्रेसका सुरेन्द्र चौधरीले अग्रता लिइरहेका छन् । चौधरीले १९ हजार ५१७ मत पाएका छन् भने नेकपा एमालेका राजकुमार गुप्ताले १९ हजार २३९ मत पाएका छन् । त्यस्तै, नेपाल सुशासन पार्टीका राजकुमार यादवले ९ हजार १० मत पाएका छन् ।
९० हजार ४३२ मतदाता रहेको यो क्षेत्रमा ६४ हजार ४४८ मत खसेको थियो ।
त्यस्तै, पर्साको निर्वाचन क्षेत्र नम्बर–४ बाट नेपाली कांग्रेसका रमेश रिजाल प्रतिनिधिसभा सदस्यमा निर्वाचित भएका छन् । उनले त्यहाँ नेकपा एमालेका जालिम मियाँ अंसारीलाई पराजित गर्दै जित निकालेका हुन् । निर्वाचन आयोगले दिएको मतपरिणामअनुसार रिजालले ३१ हजार १४२ मत ल्याएर विजयी हुँदा जालिमले २५ हजार ६१२ मत ल्याए ।
प्रदेशको नतिजा पनि सार्वजनिक
प्रदेशसभातर्फ पर्साको आठवटै निर्वाचन क्षेत्रको नतिजा पनि सार्वजनिक भइसकेको छ । पछिल्लो मतपरिणामअनुसार पर्सा क्षेत्र नम्बर–१ (क) मा नेकपा माओवादी केन्द्रका रहवर अन्सारी विजयी भएका छन् । उनले ७ हजार ८१७ मतसहित विजयी हासिल गरेका हुन् ।
नेकपा एमालेका विचारीप्रसाद यादव दोस्रो भएका छन् । उनले ५ हजार ५१८ मत पाएका छन् । तेस्रो स्थानमा स्वतन्त्र उम्मेदवार जनत अन्सारीले ५ हजार २८६ मत पाए ।
प्रदेशसभा सदस्यमा निर्वाचित अन्सारी २०७४ सालको स्थानीय तह निर्वाचनमा वीरगञ्ज महानगरमा माओवादी केन्द्रबाट मेयरका प्रत्यासी थिए ।
त्यस्तै, पर्सा–१ (ख) बाट ७ हजार ५४५ मत ल्याएर प्रदेशसभा सदस्यमा मुख्यमन्त्री लालबाबु राउत पुनः निर्वाचित भएका छन् । उनका निकटतम प्रतिद्वन्दी नेपाली कांग्रेसका रामनारायणप्रसाद कुर्मीले ६ हजार २१२ मत पाएका छन् ।
तेस्रो स्थानमा रहेका राष्ट्रिय प्रजातन्त्र पार्टीका उम्मेदवार विनयकुमार झाले २ हजार ८४१ र हाम्रो नेपाली पार्टीका ओमप्रकाश सर्राफले २ हजार ४१ मत पाए ।
पर्सा–२ को (क)मा नेपाली कांग्रेसका श्याम पटेल निर्वाचित भएका छन् । निकटतम् प्रतिस्पर्धी जनता समाजवादी पार्टीका रामनरेशप्रसाद यादवलाई १ हजार ६५७ मतान्तरले पराजित गर्दै पटेल निर्वाचित भएका हुन् । पटेलले १३ हजार ७८४ मत पाउँदा यादवले १२ हजार १२७ मत ल्याए ।
पर्सा–२ को (ख)मा लोकतान्त्रिक समाजवादी पार्टीका रमेशप्रसाद कुर्मी दोस्रो कार्यकालका लागि निर्वाचित भएका छन् । कुर्मीले ९ हजार ४७१ मत प्राप्त गर्दा उनका निकटतम प्रतिद्वन्द्वी रुपेशमान सिंहले ६ हजार ८३४ मत मात्र प्राप्त गरे ।
पाँच दलीय गठबन्धनको तर्फबाट साझा उम्मेदवार रहेका कुर्मी यसअघि पनि सोही क्षेत्रबाट तत्कालिन राष्ट्रिय जनता पार्टीबाट निर्वाचित भएका थिए । कुर्मीले यसअघि नेपाली कांग्रेसका रामरूप कुर्मीलाई पराजित गरेका थिए ।
त्यस्तै, क्षेत्र नम्बर–३ (क) मा स्वतन्त्र उम्मेदवार प्रमोदकुमार जैसवाल विजयी भएका छन् । ७ हजार २८१ मत ल्याएर उनी विजयी हुँदा उनका निकटतम प्रतिद्वन्द्वी नेकपा एमालेका अबदुलरहिम अन्सारी ५ हजार ९३० मत प्राप्त गरी दोस्रो स्थानमा समेटिए । यसअघि सो क्षेत्रबाट २०७४ सालको चुनावमा तत्कालीन जसपाका अबदुलरहिम निर्वाचित भएका थिए ।
पर्सा क्षेत्र नम्बर–३ (ख) बाट प्रदेशसभा सदस्यमा नेपाली कांग्रेसका जर्नादन सिंह क्षेत्री विजयी भएका छन् ।
उनले ११ हजार २८४ मत ल्याएर विजयी हुँदा उनका निकटतम प्रतिद्वन्द्वी जसपाकी मधु गुप्ताले ७ हजार ४९६ मत प्राप्त गरिन् । नेकपा एकीकृत समाजवादीका प्रह्लाद गिरी गोस्वामी ६ हजार ५०३ मत ल्याएर तेस्रो स्थानमा सीमित रहे ।
पर्साको निर्वाचन क्षेत्र नम्बर–४ (क) मा नेपाली कांग्रेसका शंकर चौधरी निर्वाचित भएका छन् । चौधरीले १२ हजार १५४ मत ल्याएर निर्वाचित हुँदा एमालेका जयप्रकाश थारु १० हजार ४३८ मत ल्याए । त्यस्तै, क्षेत्र नम्बर–४ (ख) मा स्वतन्त्र उम्मेदवारलाई पराजित गरी जसपाका सिंगासन सा कलवार विजयी भएका छन् । उनले १५ हजार ३८५ मत ल्याउँदा स्वतन्त्र उम्मेदवार प्रल्हाद साह कानुले १२ हजार ६४१ मत प्राप्त गरे । सत्तारूढ गठबन्धनबाट उम्मेदवारी दिएकी माओवादी केन्द्रकी चाँद तारा कुमारी १ हजार ७६५ मत ल्याइन् । सिंगासन २०७४ सालको निर्वाचनमा तत्कालीन संघीय समाजवादी फोरमबाट विजयी भएका थिए ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
