प्रतिनिधिसभा र प्रदेशसभाको मंसिर ४ गते सम्पन्न निर्वाचनअन्तर्गत समानुपातिकतर्फ मधेस प्रदेशमा अहिलेसम्म कुल १७ लाख ३६ हजार ४०५ मतगणना गरिएको छ । आयोगका अनुसार हालसम्म गणना गरिएको मतअनुसार मधेस प्रदेशमा नेपाली कांग्रेसले ३ लाख ४३ हजार २७२ मत प्राप्त गर्दा नेकपा एमालेले ३ लाख ५ हजार ४६२ र जनता समाजवादी पार्टी नेपालले २ लाख ४९ हजार ६८० मत प्राप्त गरेको छ ।
त्यस्तै, जनमत पार्टीले २ लाख ४३ हजार २९१, नेकपा माओवादी केन्द्रले १ लाख ५६ हजार ९७० र नेकपा एकीकृत समाजवादी पार्टीले ९७ हजार २२६ मत प्राप्त गरेका छन् । आयोगको विवरणअनुसार लोकतान्त्रिक समाजवादी पार्टीले ८६ हजार १३७, राष्ट्रिय प्रजातन्त्र पार्टीले ५७ हजार ८०४, नेपाल संघीय समाजवादी पार्टीले ४४ हजार ४, नागरिक उन्मुक्ति पार्टीले ४० हजार ७४ र बहुजन एकता पार्टीले १८ हजार ४ मत प्राप्त गरेका छन् ।
समानुपातिक निर्वाचन प्रणाली अन्तर्गत मधेस प्रदेशमा कूल ३६ दल निर्वाचन प्रक्रियामा भाग लिएका थिए । त्यसमध्ये सबैभन्दा अन्तिममा रहेको बहुजन समाज पार्टीले ४६९ मत प्राप्त गरेको छ । आयोगले अन्य प्रदेशको पनि समानुपातिकतर्फको मतगणना जारी राखेको छ । प्रदेश नम्बर–१ मा १६ लाख ५४ हजार २८५ मतगणना भइसकेको छ ।
बागमती प्रदेशमा १६ लाख १२ हजार ४९४, गण्डकी प्रदेशमा ९ लाख १८ हजार ८३९, लुम्बिनी प्रदेशमा १८ लाख ५९ हजार ६२, कर्णाली प्रदेशमा ५ लाख ७७ हजार ८२९ र सुदूरपश्चिम प्रदेशमा ८ लाख ७ हजार १३८ मतगणना भइसकेको छ ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
