मकवानपुरको मनहरी गाउँपालिका–९ ज्यामिरेमा स्कुटर दुर्घटना हुँदा तीनजनाको मृत्यु भएको छ । प्रहरीका अनुसार मृत्यु हुनेमा मकवानपुरको मनहरी गाउँपालिका–८ सिमपानी बस्ने अन्दाजी ३० वर्षीय धर्मराज मोक्तान, सोही ठाउँका मिलन मोक्तान र मकवानपुरको राक्सिराङ गाउँपालिका–३ लावती बस्ने रूपेश तामाङ रहेका छन् । 

धर्मराजलाई आज बिहान ३ः३५ बजे तथा मिलन र रूपेशलाई अस्पताल पुर्याउनासाथ गएराति सवा १२ बजे डाक्टरले मृत घोषणा गरेका इलाका प्रहरी कार्यालय मनहरीका प्रहरी निरीक्ष कृष्णराज ढकालले जानकारी दिए ।

गएराति करिब पौने ११ बजेतिर मनहरी गाउँपालिका–९ को ज्यामिरे, भलादमी चोकमा स्कुटर दुर्घटना भएको सूचना पाएपछि इलाका प्रहरी कार्यालय मनहरीबाट प्रहरीको टोली घटनास्थल पुगेको थियो । प्रहरीले तीनैजनालाई गम्भीर अवस्थामा उद्धार गरी उपचारका लागि चितवनको पुरानो मेडिकल कलेज पठाएको थियो । 

स्थानीयले सवारी साधनले ठक्कर दिँदा स्कुटरमा सवार तीनै जनाको मृत्यु भएको भन्दै दोषीलाई कारबाहीको माग गर्दै केहीबेर सडक अवरुद्ध गरेका थिए । प्रहरीका अनुसार ठक्कर दिने सवारीलाई नियन्त्रणमा लिने निष्कर्षसहित सडक खुलाइएको थियो ।