पक्राउ परेका नागरिक उन्मुक्तिका सांसद अरुणकुमार चौधरीलाई काठमाडौं लैजाने तयारी गरिएको छ । कैलालीको धनगढी ल्याउन सुरक्षा चुनौती देखिए पनि हवाई मार्गबाट काठमाडौं लिने तयारी गरिएको हो ।
सुरक्षा संवेदनशीलताका कारण काठमाडौं लगेर त्यहाँबाट कैलालीको धनगढी ल्याउने तयारी भइरहेको प्रहरी जनाएको छ । प्रहरीको नियन्त्रणमा रहेका सांसद चौधरीलाई बाँकेबाट हवाई मार्ग भएर काठमाडौं लैजाने र त्यहाँबाट हवाई मार्गमै धनगढी उतार्ने बारेमा छलफल भइरहेको छ ।
सुदूरपश्चिम प्रदेश प्रहरी कार्यालयका एसएसपी भोलाबहादुर रावलले बाँकेबाट पक्राउ परेका सांसदलाई कैलाली ल्याउने रुट आफूलाई यकिन जानकारी दिए । कैलाली क्षेत्र नम्बर २ बाट निर्वाचित सांसद चौधरीलाई १० वर्षअघि ट्याक्टर जलाएको मुद्दामा कैलाली जिल्ला अदालतले ६ महिना कैदको फैसला सुनाएको थियो ।
अदालतको उक्त फैसलाअनुसार कैद सजाय भुक्तान नगरेका चौधरी मंसिर ४ को निर्वाचनमा प्रतिनिधि सभा सदस्य निर्वाचित भएका थिए । प्रतिनिधिसभा चौधरीसहित पर्शराम चौधरी र वीर बहादुर चौधरीलाई जिल्ला अदालत कैलालीले २०७० वैशाख ९ गते जनही ६ महिना कैद र ८ लाख १८ हजार ४२३ रुपैयाँ पीडितलाई भराउने फैसला गरेको थियो ।
साबिकको बलिया गाविस ५ का महादेव बजगाईँले २०६६ भदौ ३ गते लु २ त २११ नम्बरको निजी ट्याक्टर जलाएको आरोपसहित २०६७ भदौ २ गते जिल्ला अदालत कैलालीमा मुद्दा हालेका थिए । उक्त मुद्दामा जिल्ला अदालतका न्यायाधीश विष्णु सुवेदीको एकल इजलासले तीन जनालाई जनही ६ महिना कैद र बिगो असुल्न गर्न आदेश दिएको थियो ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
