निलम्बित प्रतिनिधि सभा सांसद अरुण चौधरीको स्वास्थ्यमा समस्या देखिएको छ । आँखामा समस्या देखिएपछि उनलाई अस्पताल लगिएको छ ।

कैलालीको धनगढीस्थित धनगढी नेत्रालयमा चेकजाँचका लागि लगिएको जिल्ला प्रहरी कार्यालय कैलालीका प्रहरी निरीक्षक खगेन्द्र साउँदले जानकारी दिए । 

कैलाली–२ बाट निर्वाचित भएका चौधरी ३ भदौ २०६६ मा लु २ त २११ नम्बरको ट्रयाक्टर जलाएको भन्दै १९ माघमा बाँकेबाट पक्राउ परेका हुन् । २ भदौ २०६७ मा कैलाली जिल्ला अदालतमा अरुण चौधरीसहित तीन जनाविरुद्ध मुद्दा दर्ता भएको थियो । 

सोही मुद्दामा ९ वैशाख २०७० मा जिल्ला अदालतले चौधरीसहित पर्सराम चौधरी र वीरबहादुर चौधरीलाई जनही ६ महिना कैद र ८ लाख १८ हजार ४२३ रुपैयाँ पीडितलाई उपलब्ध गराउने फैसला गरेको थियो । 

६ महिना कैद भुक्तान नगरेको भन्दै चौधरीलाई प्रहरीले पक्राउ गरेर अदालतमार्फत कारागार चलान गरिएको थियो ।