बाराको जीतपुरसिमरा उपमहानगरपालिका–७ स्थित सिटी मार्केटमा आगलागी हुँदा पाँचवटा पसल पूर्णरूपमा जलेर नष्ट भएका छन् । आज बिहान भएको आगलागीमा अन्य पसलमा पनि क्षति पुगेको छ ।  

स्थानीय व्यवसायी अनिल साहको रेडिमेड कपडा पसलमा विद्युत सर्ट हुँदा आगलागी भएको प्रहरीले जनाएको छ । दमकल,नेपाल प्रहरी,सशस्त्र प्रहरी,स्थानीयबासिन्दा र व्यवसायीको सहयोगमा आगो नियन्त्रणमा आएको थियो । 

आगो निभाउन अमलेखगंजस्थित नेपाल आयल निगमको क्षेत्रीय डिपो,जीतपुरसिमरा उपमहानगरपालिका र वीरगन्ज महानगरपालिकाबाट दमकल आएका थिए । अधिकांश कपडा पसल रहेको उक्त मार्केटमा आगलागी सुरु भएलगत्तै स्थानीय व्यवसायीले प्रहरी र दमकललाई खबर गरेका थिए ।

झन्डै तीन घण्टासम्म लागेको आगोले ६० लाख मूल्य बराबरको क्षति भएको प्रहरीको प्रारम्भिक अनुमान छ ।