एजेन्सी– गत बिहिबार भारत प्रशासित कश्मिरको पुलवामामा भारतीय सैनिकमाथि भएको आक्रमणबारे पहिलो पटक पाकिस्तानी प्रधानमन्त्री इमरान खानले अभिव्यक्ति दिएका छन् । उनले आफूहरुले स्थिरता चाहेकाले यस्तो षडयन्त्र आफूहरुले नरच्ने बताएका छन् ।

‘हामी स्थिरता चाहन्छौँ, यस्तो सोच्न पनि सक्दैनौँ,’ उनको भनाइलाई अन्तर्राष्ट्रिय सन्चारमाध्यमले उद्धृत गरेका छन्, ‘हामी त यसको छानबिनमा भारतलाई सहयोग गर्न तयार छौँ ।’ इमरानले बरु भारतले सबैभन्दा पहिले कश्मिरका युवा किन आफ्नो ज्यान दिन तयार भन्नेबारे सोधखोज गर्नु पर्ने अर्ति पनि दिएका छन् । उनले यसमा पाकिस्तानको जमिन प्रयोग भएको भए र दोषी भेटिए आफूहरुले कारवाही गर्ने पनि बताएका छन् ।

उनले आफूहरु साउदी अरबका राजकुमारको भ्रमणमा व्यस्त भएकाले यस विषयमा यसअघि कुनै जवाफ दिन नपाएको पनि स्पष्टिकरण दिएका छन् । आतंकवादलाई पाकिस्तानले सहयोग नगर्ने पनि उनको बताएका छन् ।