काठमाडौं– केही दिनअघि भारतीय गायक सोनु निगम नेपाल आएका थिए । यसको एउटै उद्देश्य थियो– उनको नयाँ गीतको म्युजिक भिडियो सुट गर्नु । छालामा एलर्जी भएपछि लामो समय अस्पतालमा र घरमा रेस्ट गरेका सोनु ठिक भएलगत्तै नेपाल आइपुगेका थिए । उनको गीतको सुटिङ पोखरामा हुने भनिएको थियो । 

तर, उनी मंगलबार थापाथलीमा रहेको नर्भिक अस्पतालमा भर्ना भए । ढाडमा समस्या देखिएपछि उनलाई अस्पताल पुर्याइएको थियो । दिउँसो अस्पताल पुर्याइएका निगमलाई आजै डिस्चार्ज गरेर होटल लगिन सक्ने अस्पताल स्रोतले जनाएको छ । आज डिस्चार्ज नभए उनलाई भोलिसम्म अस्पतालमा नै राखिने छ ।

अस्पतालमा उनको एक्सरे, रगत जाँच तथा एमआरआई गरिएको अस्पतालले जनाएको छ । एमआरआईको रिपोर्ट आएपछि सोनुलाई अस्पतालमै राखिने वा होटल फर्काइने भन्ने निर्णय गरिने अस्पताल स्रोतले जनाएको छ ।