काठमाडौं– सांसद विकास कोषको रकम हिनामिना गरेको आरोपमा सल्यानका तत्कालीन स्थानीय विकास अधिकारीसहित १८ जनाविरुद्ध अख्तियार दुरुपयोग अनुसन्धान आयोगले विशेष अदालतमा मुद्दा दायर गरेको छ ।

सांसद विकास कोषबाट सल्यानको बागचौर नगरपालिका–५ बांगेलाकुरी बजारमा विद्युत लाइन विस्तारका लागि छुट्याइएको १० लाख रुपैयाँ हिनामिना भएको ठहरसहित अख्तियारले दायर गरेको भ्रष्टाचार मुद्दामा १० कर्मचारी, उपभोक्ता समितिका पदाधिकारी र एक सामान सप्लायर्सलाई विपक्षी बनाइएको छ ।

भ्रष्टाचार मुद्दामा तानिनेमा तत्कालीन स्थानीय विकास अधिकारी खिमबहादुर रायमाझी, प्रमख जिल्ला इन्जिनियर जगदीश शर्मा, लेखा अधिकृत प्रकाश केसी, बागचौर नगरपालिकाकी प्रमुख प्रशासकीय अधिकृत निर्मला मल्ल, लेखा अधिकृत तोरणप्रसाद घिमिरेलगायत छन् ।

विद्युत लाइन विस्तारका लागि सभासद कोषबाट १० लाख र साविक शिवरथ गाविसबाट ५ लाख रुपैयाँ छुट्याइएकोमा उपभोक्ता समितिले पोल गाड्ने काम मात्र गरेको र अन्य काम नगरी हिनामिना गरेको अख्तियारको ठहर छ । त्यसमा तत्कालीन एलडिओसहित जिविसका कर्मचारीको मिलेमतो भएको उसको दाबी छ ।