ढाका– बंगलादेशमा विमान अपहरणको प्रयास भएको छ । 

बंगलादेशी अधिकारीहरुका अनुसार बंगलादेश एयरको एक विमानलाई आपत्कालीन अवस्थामा चिटगाउँको साह अमानत एयरपोर्टमा अवतरण गरिएको छ । 

विमानका पाइलटसहित सबै यात्रु सुरक्षित रहेका त्यहाँको नागरिक उड्डयन तथा पर्यटन मन्त्रालयले जनाएको छ । तर, अझै एक सन्दिग्ध यात्री र एक क्रु मेम्बर विमानभित्रै छन् । 

अधिकारीहरुका अनुसार सन्दिग्ध यात्रीसँग कुराकानीको प्रयास भइरहेको छ । तर, अधिकारीहरुले के वार्ता भइरहेको छ भन्नेबारे भने खुलाएका छैनन् । अहिले विमानस्थल र हवाई अड्डासमेत बन्द गरिएको छ ।