दर्शकहरुको रोजाइम परेको हास्य टेलिशृंखला ‘सक्किगोनि’को तेस्रो सिजन आज बिहीबारदेखि प्रसारण हुने भएको छ। 

आज बेलुका ८ बजेदेखि हिमालय टेलिभिजनमा प्रसारण लगत्तै ९ बजे इएच डिजिटल युट्युब च्यानलमा प्रसारण हुने टिमका कलाकार प्रकाश बस्नेतले जानकारी दिए । 

दर्शकको चाहना र स्वादलाई दृष्टिगत गरी ग्रामीण जनजीवन र परिवेशलाई जस्ताको तस्तै उतारिएको निर्माण टिमले दाबी गरेको छ । केही दिनअघि ‘सक्किगोनि’को टिजर सार्वजनिक गरिएको थियो। 

 ‘सक्किगोनि’को तेस्रो सिजन काभ्रेपलाञ्चोकको पाँचखालमा छायांकन भइरहेको छ । यस सिजनमा पनि अधिकांश पुरानै कलाकारको बाहुल्य रहनेछ । 

अर्जुन घिमिरे, कुमार कट्टेल, कमलमणि नेपाल, दीपक आचार्य, सागर लम्साल, हरि निरौला, प्रियाना आचार्य, प्रकाश बस्नेतको साथमा केही नयाँ अनुहार देखिनेछन्।