काठमाडौं– सरकारले खाना पकाउने एलपी ग्यासको कृत्रिम अभाव गरिएको आशंकामा अनुगमनलाई व्यापक बनाएको छ । उद्योगी र विक्रेताको मिलेमतोमा बजारमा ग्यासको कृत्रिम अभाव सिर्जना गरिएको हुन सक्ने भन्दै वाणिज्य, आपूर्ति तथा उपभोक्ता संरक्षण विभागले अनुगमनलाई तीव्रता दिएको हो ।

पर्याप्त मात्रामा ग्यासको आपूर्ति हुँदाहुँदै पनि कृत्रिम अभाव सिर्जना गरिएको आशंकामा तीन दिनदेखि बजार अनुगमनलाई तीव्र पारिएको विभागका महानिर्देशक योगेन्द्र गौचनले जानकारी दिए । नेपाल आयल निगमका प्रतिनिधि सम्मिलित अनुगमन टोलीले ग्यास डिपोमा पुगेर ग्यासको मौज्दातको अवस्थाका बारेमा अनुगमन गरेको उनले बताए । 

अनुगमनका क्रममा ग्यास लुकाएको वा कालोबजारी गरेको पाइए उपभोक्ता संरक्षण ऐन, २०७५ बमोजिम कारबाही गरिने गौचनले बताए । अनुगमनलाई देशव्यापी बनाउने योजना बनाइए पनि कर्मचारीअभावका कारण प्रभावकारी ढंगबाट सञ्चालन गर्न नसकिएको बताइएको छ । 

उद्योगीले कमिसन बढाउनुपर्ने भन्दै ग्यासको पिडिओ खरिद गर्न बन्द गरेसँगै व्यापारीले बजारमा कृत्रिम अभाव सिर्जना गरेका छन् । बजारमा पर्याप्त ग्यास हुँदाहुँदै बिक्रेताले उद्योगबाट नआएको भन्दै बिक्री बन्द गरेका छन् । 

तर, नेपाल आयल निगमले भने ग्यासको आपूर्तिमा कुनै समस्या नभएको दाबी गर्दै अभाव नरहेको जनाएको छ ।