logo-img

एमालेले आज पनि संसद् अवरुद्ध गर्ने, प्रधानमन्त्री अवरोध हटाउन तयार नभएको दाबी

नेकपा एमालेका सचेतक महेश बर्तौलाले सरकारले संघीय संसदको अवरोध हटाउन कुनै चासो नदिएको आरोप लगाएका छन् । प्रमुख प्रतिपक्षी एमालेले सदनमा उठाएका विषयलाई एकपछि अर्को गर्दै पुष्टि गर्ने काम मात्र गरेको आरोप लगाउँदै बर्तौलाले अहिलेकै अवस्थामा आइतबार पनि संसद् बैठक सुचारु हुन नसक्ने संकेत गरेका हुन् । 

सरकारले शुक्रबार नक्कली भुटानी शरणार्थी र सुन प्रकरणमा अनुसन्धान गरिरहेका नेपाल प्रहरीका प्रहरी अतिरिक्त महानिरीक्षक (एआईजी) को सरुवाले सुन तस्करीमा एमालेको उच्चस्तरीय समिति बनाउनुपर्ने मागलाई पुष्टि गरेको दाबी गरे । प्रहरी अनुसन्धान आफू प्रतिकूल हुन लागेपछि सरकारले अनुसन्धानमा रहेका प्रहरीलाई नै  सरुवा गरेको उनको आरोप छ ।  

‘सरकारले हाम्रो मागलाई सम्बोधन गर्न कुनै पहल गरेको छैन । सुन प्रकरणमा उच्चस्तरीय छानबिन समितिको आवश्यकता र हाम्रो मागको औचित्यलाई सरकारले आफू प्रतिकूल हुने देखेपछि गरेको प्रहरी अधिकारीको सरुवाले पुष्टि गर्छ,’ उनले भने, ‘यसले सरकारले आफू अनुकूल गर्न जे गर्दा पनि हुन्छ भन्ने रवैया र गम्भीर संकेत देखाएको छ ।’

प्रधानमन्त्री पुष्पकमल दाहाल प्रचण्डले आजबाट संसद् चल्छ भनेर शनिबार बताएका थिए । तर, एमाले सचेतक बर्तौलाले भने संसद् खोल्न प्रधानमन्त्रीबाट कुनै पहल नभएको दाबी गरे ।

‘उहाँ (प्रधानमन्त्री) ले संसद् चल्छ भन्नुभयो, तर अहिलेसम्म कुनै छलफलको वातावरण बनाउने प्रयास भएको छैन,’ उनले भने, ‘प्रमज्यू संसदमै आएर हाम्रो मागलाई सम्बोधन गर्ने मनस्थितिमा हुनुहुन्छ भने त हामी साथ दिन तयारै छौँ । तर, अहिलेसम्म कुनै छलफलको वातावरण नबनेकोले हामी आफ्नो मागमै कायम छौँ ।’ 





  • प्रकाशित मिति : भदौ ३, २०८० आइतबार १०:४६:०

फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।



यस विषयसँग सम्बन्धित समाचार

यो सामग्री सेयर गर्नुहोस्

यो सामग्री सेयर गर्नुहोस्

यो पनि नछुटाउनुहोस्
मल्टिमिडिया