Fri, 20 Sep, 2019


ब्रेक्जिटबारे अन्योलमा बेलायत, प्रधानमन्त्रीको सम्झौता प्रस्तावमाथि दोस्रोपटक संसद्मा भोटिङ हुँदै
फरकधार / फागुन २८, २०७५

लन्डन– बेलायत युरोपियन युनियनबाट अलग हुन केवल दुई साता बाँकी रहँदा ब्रेक्जिट सम्झौताबारे बेलायती सांसदहरुले मतदान गर्दै छन् । 



यस मुद्दामा सांसदहरुले दाेस्रोपटक आज बेलुकी भोट हाल्दै छन् । भोटिङको पूर्वसन्ध्यामा हिजो मात्रै प्रधानमन्त्री टेरेसा मेले स्ट्रासबर्गको भ्रमण गरी युरोपियन कमिसनका अध्यक्ष जिन क्लाउड जंकरसँग भेट गरेकी थिइन् । 

हप्तौँको अन्योलपछि हिजो साँझ यी दुई नेताले ब्रेक्जिटसँगै जोडिने विभिन्न सम्झौताको मोडलबारे सहमतिमा पुगेको घोषणा गरेका थिए । 

बेलायतको संसद्ले प्रधानमन्त्री मेको सम्झौता प्रस्तावलाई अस्वीकार गर्दै पुनःसम्झौता गर्न उनलाई कार्यादेश दिएको थियो । 

ब्रेक्जिटपछि आयरल्यान्डसँगको सिमाना खुला राख्ने या नराख्ने भन्नेमा विवाद छ । योसँगै अन्य केही विवादका कारण कुनै सम्झौताविनै ब्रेक्जिट हुने अवस्था आए यसले बेलायतको अर्थतन्त्रमा गम्भीर असर निम्त्याउने विश्लेषण भइरहेको छ । इयुलाई भने यसले त्यति ठूलो असर नगर्ने बताइन्छ । 

२०१६ को जुनमा बेलायत युरोपियन युनियनबाट अलग हुने या नहुने विषयमा जनमत संग्रह हुँदा अलग हुने पक्षमा (ब्रेक्जिटको पक्षमा) निर्णय आएको थियो ।

आफ्नो नीतिविपरीत नतिजा आएसँगै तत्कालीन प्रधानमन्त्री डेभिड क्यामरुनले राजीनामा दिएपछि ब्रेक्जिटको पक्षमा वकालत गर्दै आएकी टेरेसा मेको नेतृत्वमा सरकार बनेको थियो ।

तर, त्यसयता प्रधानमन्त्री मेका लागि यो मुद्दा सहज भने भएको छैन । पछिल्लो समय उनले संसद्मा अनेकौँ सवाल र दबाबको सामना गरिरहनुपरेको छ । 

इयुबाट बहिर्गमन हुनुअघि ब्रेक्जिटसम्बन्धी भरपर्दो सम्झौता गर्नु र त्यसका लागि समझदारी जुटाउनु उनका मुख्य चुनौती बनेका छन् । 
 


यस विषयसँग सम्बन्धित समाचार

यो सामाग्री सेयर गर्नुहोस्


यो पनि नछुटाउनुहोस्