चीनको केरुङबाट रसुवागढी नाका हुँदै ल्याइएको एक किलो सुनसहित एक महिला पक्राउ परेकी छन् । पक्राउ पर्नेमा रसुवाको गोसाइँकुण्ड गाउँपालिका–३ की ४१ वर्षीया पाछेमु तामाङ (गुरुङ) रहेकी रसुवाका प्रहरी नायब उपरीक्षक (डिएसपी) सुवास बुढाथोकीले जानकारी दिए ।

उनका अनुसार नेपाल–चीन सिमानामा पर्ने रसुवागढीस्थित मितेरी पुलमा नेपाल प्रहरी, सशस्त्र प्रहरी बल र रसुवा भन्सार कार्यालयको संयुक्त चेकिङ टोलीले नियमित चेकजाँचको क्रममा उनलाई एक किलो सुनसहित नियन्त्रणमा लिइएको  हो ।  

लुकाइछिपाई चारवटा टुक्रा पारी ल्याएको अन्दाजी एक केजी सुन चीनबाट नेपालतर्फ पैदल आउँदै गर्दा मितेरी पुलबाटै बरामद गरिएको प्रहरीले जनाएको छ ।