काठमाडौं– चलचित्र निर्मात्री तथा अभिनेत्री रेखा थापाले महिला क्रिकेट टिम किनेकी छिन् । आगामी महिना विराटनगरमा हुने एनसिएल महिला टी–२० प्रतियोगिताका लागि रेखाले काठमाडौं सुपर च्याम्पियन्स टिम किनेकी हुन् ।

सोमबार काठमाडौंमा भएको पत्रकार सम्मेलनमा उनले आफूले १४ वर्षदेखि महिलाको क्षेत्रमा काम गरेको बताउँदै महिला क्रिकेटमा पनि योदगान दिन टिम खरिद गरेको बताइन् । चलचित्र निर्माणमा पनि रेखा पछिल्लो समय महिलाकेन्द्रित छिन् । 

पत्रकार सम्मेलनमा टी–२० लिगमा सहभागी हुने चार टिम, टिम मालिक र मार्की खेलाडी घोषणा गरियो । रेखाको काठमाडौं सुपर च्याम्पियन्समा नेरी थापा मार्की खेलाडीको रुपमा भित्रिएकी छिन् । 

अनुप सक्सेराले स्वामित्व लिएको विराटनगर रोअरिङकी मार्की खेलाडी करुणा भण्डारी छिन् भने अनिल भण्डारी र दीपक सुवेदीको स्वामित्वमा रहेको भैरहवा क्विन्सकी मार्की खेलाडी राष्ट्रिय टिमकी कप्तान रुबिना क्षेत्री छिन्। घोषणा भएको चौँथो टिम धनगढी वन्डरवुमेनको स्वामित्व हरि खनालले लिएका छन् । यो टिमकी मार्की खेलाडी सीता रानामगर छिन् । 

प्रतियोगितामा वैशाख ७ देखि १४ गतेसम्म विराटनगरको बैजनाथपुर रंगशालामा चल्नेछ । बाँकी खेलाडी भित्र्याउन छिटै अक्सनको मिति तोकिने आयोजकले जनाएको छ ।