बुधबार राष्ट्रिय सभा निर्वाचनको सिट भागबण्डाका लागि बसेको सत्तारुढ गठबन्धनको बैठक विनानिष्कर्ष टुंगियो । एकातिर गठबन्धनभित्रका दललाई मिलाउनुपर्ने बाध्यता, अर्कोतिर प्रमुख प्रतिपक्षी दल नेकपा एमालेलाई पनि समेट्नुपर्ने आवश्यकताका कारण गठबन्धनका प्रमुख दुई दल कांग्रेस र एमाले अफ्ट्यारोमा परेका छन् ।  

शान्तिप्रक्रियाको काम टुंगो लगाउनुुपर्ने र त्यसका लागि एमालेको साथ चाहिने आवश्यकता महसुस गरेर कांग्रेस र माओवादी राष्ट्रिय सभा निर्वाचनमा नेकपा एमालेलाई समेट्न सकारात्मक देखिएका हुन् । बुधबार प्रधानमन्त्रीसँगको भेटमा एमाले अध्यक्ष केपी शर्मा ओलीले राष्ट्रिय सभामा आफूहरूलाई यथोचित सम्मानका साथ समेटेमा यसपछिका विषयमा पनि सहमति गरेर जान सकिने प्रस्ताव गरेका थिए ।

राष्ट्रिय सभामा एमालेबाट खाली हुन लागेको नौ सिटमध्ये पाँच सिट आफूहरूलाई दिनुपर्ने एमालेको माग छ । तर, सत्तापक्ष तीन सिटसम्म दिन तयार हुने हो भने एमालेले चित्त बुझाउन सक्ने सम्भावना छ । 

एमाले​लाई सिट भागबण्डा गर्दा आफूहरूको भाग खोसिने डरले साना दलहरूले भने एमाले​को प्रस्ताव ठाडै अस्वीकार गर्दै आएका छन् । एमालेबाट छुट्टिएर बनेको नेकपा एकीकृत समाजवादी र चुनावमा एमालेसँगै गठबन्धन गरेको जनता समाजवादी पार्टी मात्र होइन, जनमत पार्टीले समेत राष्ट्रिय सभा निर्वाचनमा एमालेसँग सहकार्य गर्न नहुने अडान राख्दै आएका छन् । 

पछिल्लो समय गठबन्धन बैठकमा पनि आफूहरूलाई बोलाउन छोडेको भन्दै उनीहरूले असन्तुष्टि व्यक्त गरेका छन् । जनमत पार्टीका अध्यक्ष सिके राउतले आफूहरू गठबन्धनमा भए पनि निर्णय भएपछि मात्र जानकारी गराउने गरेको भन्दै आपत्ति प्रकट गरेका छन् । 

गठबन्धनकै अर्को दल जसपाले पनि एमालेलाई सिट दिएर राष्ट्रिय सभामा जाने सहमति मान्य नहुने चेतावनी दिएको छ । एकीकृत समाजवादीले त एमालेसँग मिलेर राष्ट्रिय सभा निर्वाचनमा गएमा आफ्नो पार्टी गठबन्धनबाटै बाहिरिने धम्की दिएको छ । साना दल मात्र होइन, सबैभन्दा ठूलो दल नेपाली कांग्रेसको इतर पक्ष पनि राष्ट्रिय सभा निर्वाचनमा एमालेसँग सहकार्य गर्न नहुने अडानमा छ ।

शान्ति प्रक्रियाको टुंगो लगाउने विषय मात्र होइन, राजतन्त्र पक्षधरहरूको पछिल्लो सक्रियताका कारण पनि ठूला तीन दलले एक ठाउँमा उभिनुपर्ने आवश्यकता महसुस गरेका छन् । सोमबार कांग्रेसले मेलमिलाप दिवसका अवसरमा आयोजना गरेको कार्यक्रममा ती दलका नेताहरूले व्यक्त गरेको विचारबाट पनि सो कुरा पुष्टि हुन्छ । 

पुराना दलप्रतिको आमजनताको वितृष्णा र त्यसैलाई उपयोग गर्दै संसदको चौथो दल बन्न सफल भएको रास्वपाका कारण पनि ठूला दलले मिलेर जानुपर्ने आवश्यकता महसुस गरेका छन् । यही समयमा उत्तरी र दक्षिणी मित्रराष्ट्रहरूका ठूला भ्रमण हुन लागेका छन् । त्यसलाई पनि मध्यनजर गर्दै प्रमुख दलहरू नजिकिएको अनुमान गर्न सकिन्छ ।