काठमाडौं– विद्युत् प्रधिकरणले आइतबार साँझ बारा–पर्सामा आएको हावाहुरीका कारण १० देखि १५ करोडको क्षति भएको प्रारम्भिक अनुमान गरेको छ । प्रधिकरणकाे अनुसार क्षतिको पूर्ण विवरण नआइसके पनि करिब २ हजार पोल र ट्रान्सफर्मरमा क्षति भएको अनुमान छ ।

कलैया वितरण केन्द्रको विद्युत् प्रणालीमा १ हजारदेखि १५ सय पोल लडेका र तार चुडिएका प्राधिकरणले बताएको छ । तार चुडिएका कारण सम्भावित दुर्घटना कम गर्न अहिले विरगञ्ज क्षेत्रमा विद्युत् सेवा बन्द गरिएको छ । 

हावाहुरीकै कारण परावनीपुर–वीरगञ्ज ६६ केभी डबल सर्किट लाइन र वीरगञ्ज–कलैया ३३ केभी लाइन क्षतिग्रस्त भएको प्राधिकरणले जनाएको छ । 

प्राधिकरणले भारतबाट विद्युत् आयात हुने १ सय ३२ केभी रक्सौल–परवानीपुर प्रसारण लाइन तथा ३३ केभी रक्सौल–वीरगञ्ज प्रसारण लाइन क्षतिग्रस्त भएको जानकारी दिएको छ ।