मड्रिड–  स्पेनिस ला लिगाअन्तर्गत शनिबारको खेलमा जिनेदिन जिदानको रियल मड्रिडले इबरलाई पराजित गरेको छ ।

घरेलु मैदानमा भएको खेलमा रियलले इबरलाई २–१ ले पन्छायो ।  रियलका लागि दुवै गोल करिम बेन्जिमाले गरे । इबरका तर्फबाट मार्क कार्डोनाले १ गोल गरे ।

सुरुवाती अग्रता इबरले लिएको थियो । खेलको ३९औँ मिनेटमा कार्डोनाले गोल गर्दै इबरलाई अग्रता दिलाएका थिए । पहिलो हाफमा थप गोल भएन । 

५९औँ मिनेटमा रियलका करिम बेन्जिमाले पहिलो गोल फर्काए । ८१औँ मिनेटमा उनले दोस्रो गोल गर्दै रियललाई जित दिलाए ।

जितसँगै, रियलले ३१ खेलबाट ६० अंक बनाएको छ । लिगको शीर्ष स्थानमा रहेको बार्सिलोनाभन्दा रियल १३ अंकले पछि छ । इबरको भने ३१ खेलबाट ३९ अंक छ ।

जिनेदिन जिदानले क्लब छोडेपछि लगातार खराब प्रदर्शन गरिरहेको रियल उनले पुनः कोचिङ सम्हालेयता पुरानै लयमा फर्किएको छ ।