काठमाडौं महानगरपालिकाका मेयर बालेन्द्र साह (बालेन) ले चैत अन्तिमतिर सुकुम्बासी वस्तीको समस्या लिएर गृह तथा उपप्रधानमन्त्री रवि लामिछानेसँग भेट गरे । स्रोतका अनुसार, २२ चैतको उक्त भेटमा वस्ती हटाउन के–कस्ता विकल्प अघि सार्न सकिन्छ भन्नेबारे छलफल भयो । 

महानगरको मेयरमा निर्वाचित भएदेखि नै काठमाडौंलाई सफा र सुन्दर बनाउने योजनाका साथ हिँडेका बालेनले आफ्नो क्षेत्रभित्र रहेका खोलाका किनार कब्जा गरेर बसेका अवैध वस्तीलाई हटाउने प्रयास गरिरहेका छन् ।

महानगरले त्यस्ता वस्ती हटाउन गरेको पटक–पटकको प्रयास असफल भएपछि मेयर बालेनले गृह प्रशासनको आवश्यकता महसुस गर्दै आएका छन् । तर, उनको अभियानले सोचेअनुसार सार्थकता पाउन सकेको छैन । मेयर साहले सुकुम्बासी वस्ती हटाउन नसक्नुको मुख्य कारण हो– राजनीति ।

सुकुम्बासी वस्तीमा बस्ने अधिकांश व्यक्तिलाई ठूलै दलको राजनीतिक संरक्षण रहेका कारण मेयर साहको उक्त प्रयास असफल हुँदै आएको छ । महानगरसँग भएका प्रहरी र स्रोतसाधनले मात्र सुकुम्बासी वस्ती हटाउन सम्भव नदेखिएपछि बालेनले पटक–पटक उक्त विषयलाई गृह मन्त्रालयसम्म पुर्याउने गरेका छन् ।

यसअघिका गृहमन्त्रीबाट साथ नपाएका मेयर साहले वर्तमान गृहमन्त्री लामिछानेबाट सहयोग मिल्ने अपेक्षासहित भेटघाट गर्ने गरेका छन् । तर, गृहमन्त्री लामिछाने नै मेयर साहलाई सहयोग गर्ने कि नगर्ने भन्ने अन्योलमा छन् ।

मेयर साहलाई सहयोग गर्दा आफ्नो पद नै धरापमा पर्ने देखेपछि लामिछानेले पनि उनलाई खुलेर साथ दिन नसकेका हुन् । सुकुम्बासी वस्तीमा अधिकांश नेकपा माओवादी केन्द्र, नेकपा एमाले र नेपाली कांग्रेसका कार्यकर्ता रहेकाले मेयर साहलाई साथ दिन गृहमन्त्री लामिछानेलाई सकस भएको छ ।

उनले बालेनलाई साथ दिँदा प्रधानमन्त्री पुष्पकमल दाहाल प्रचण्ड र नेकपा एमाले अध्यक्ष केपी शर्मा ओली रुष्ट हुने पक्का छ । किनकि अध्यक्ष ओली र प्रचण्डले काठमाडौं केन्द्रित पार्टीका विभिन्न कार्यक्रम तथा आन्दोलनमा तीनै वस्तीका मानिसलाई सडकमा उतार्ने गरेका छन् । त्यसैले कुनै पनि पुराना राजनीतिक दल सुकुम्बासी वस्तीलाई चलाउने पक्षमा छैनन् । 

बालेनलाई साथ दिए सत्ता गठबन्धनमै धक्का पर्ने देखिएपछि गृहमन्त्री लामिछाने पनि निर्णय लिइहाल्न हच्चिएको जस्तो देखिन्छन् । यसअघि गत १२ माघमा भएको भेटमा पनि गृहमन्त्री लामिछानेसँग मेयर बालेनले सुकुम्बासी वस्ती हटाउने अभियानमा सहयोग गर्न आग्रह गरेका थिए ।

एकीकृत बागमती सभ्यता विकास समिति र महानगरको टोलीले लामिछानेलाई भेटेर १२ मंसिरमा थापाथलीस्थित सुकुम्बासी वस्ती हटाउन जाँदा भएको घटनाको विवरण सुनाउँदै सहयोगको अपेक्षा गरेका थिए । 

सुकुम्बासी वस्ती हटाउनुपर्ने कारण देखाउँदै आएका बालेनलाई खुलेर साथ दिँदा गठबन्धनका शीर्ष नेता रुष्ट हुने देखिएपछि गृहमन्त्री लामिछानेले पनि यस विषयलाई गम्भीरतापूर्वक लिएको देखिँदैन । जसरी पनि सुकुम्बासी वस्ती हटाउनुपर्छ भन्ने अड्डी कसेका मेयर साहले गृह प्रशासनको आवश्यकता महसुस गरे पनि अहिलेसम्म साथ भने पाउन सकेका छैनन् ।