काठमाडौं– च्याम्पियन्स लिगअन्तर्गत क्वाटरफाइनलको पहिलो लेगमा बार्सिलोना विजयी भएको छ ।

बुधबार रातिको खेलमा स्पेनिस क्लब बार्सिलोनाले इंग्लिस क्लब म्यानचेस्टर युनाइटेडलाई उसकै भूमिमा १–० ले पन्छायो । खेलको सुरुमै म्यानचेस्टरका लुक शाले आत्मघाती गोल गरेपछि बार्सिलोनालाई गोलै नहानी जित मिल्यो । १२औं मिनेटमा बललाई बचाउन खोज्दा डिफेन्डर शा आफ्नै पोस्टमा गोल गर्न पुगे ।

सुरुमै आत्मघाती गोलबाट पछि परेको म्यानचेस्टर खेल अवधिभर दबाबमा पर्यो । अधिकतर समय बल पोजिसन आफ्नो पकडमा राखे पनि बार्सिलोनाले थप गोल गर्न भने सकेन ।