दुईतिहाइ सरकार पूर्ण असफल, समृद्धिको आफ्नै नाराविरुद्ध प्रधानमन्त्री – प्रकाशमान
फरकधार / ३० चैत, २०७५

सप्तरी– नेपाली कांग्रेसका पूर्वमहामन्त्री प्रकाशमान सिंहले केपी ओली नेतृत्वको दुईतिहाइ सरकार पूर्ण रुपमा असफल भइसकेको बताएका छन् । 



प्रेस युनियनले सप्तरीमा गरेको पत्रकार सम्मेलनमा नेता सिंहले जनताले यो सरकार बनेदेखि नै शान्ति सुरक्षाको अनुभूति गर्न नपाएको र भ्रष्टाचार लगातार बढीरहेको बताए । 

सरकारले समृद्धिको नारा दिए पनि आफैँ त्यसविरुद्ध काम गरिरहेको उनको आरोप छ । सरकार विधि र प्रक्रियाविपरीत चलेको आरोप लगाउँदै सिंहले बजेट खर्च र छनेट भएका योजना पूरा गर्न नसक्नुले सरकार असफल छ भन्ने देखाएको टिप्पणी गरे ।

नेता सिंहले प्रधानमन्त्रीले भ्रष्टाचार नगर्ने र भ्रष्टाचार हुन नदिने बताए पनि सुनकाण्ड र बाइडबडीमा भ्रष्टाचार गर्नेलाई संरक्षण दिएर आफ्नो बोली आफैँले परिवर्तन गरेको आरोप लगाए ।



कर्मचारी समायोजनको नाममा गलत समयमा कर्मचारी यताउता गरेर देशलाई अस्तव्यस्त बनाएको भन्दै नेता सिंहले भने, ‘अहिले विकासको काम हुने समय हो । यो अवस्थामा सबै तहमा कर्मचारी हुन जरुरी छ । तर, समायोजन गर्दा धेरै ठाउँमा कर्मचारी पुग्न नसकेर काम हुन सकिरहेको छैन ।’

समायोजनमा कर्मचारीलाई चित्त बुझाउन नसक्नु सरकारको अर्को असफलता भएको उनको बुझाइ छ । 

  • प्रकाशित मिति : चैत ३०, २०७५ शनिबार १३:१३:७,  

फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, टिकटक, युट्युबमा पनि जोडिन सक्नुहुन्छ ।


यस विषयसँग सम्बन्धित समाचार

यो सामग्री सेयर गर्नुहोस्


यो पनि नछुटाउनुहोस्
मल्टिमिडिया