काठमाडौं– चालू आर्थिक वर्षको पहिलो ८ महिनामा नेपालीहरू विदेश पढ्न जाँदा मात्रै ३२ अर्ब १७ करोड रुपैयाँ रकम बाहिरिएको छ । नेपाल राष्ट्र बैंंकले सार्वजनिक गरेकोे तथ्यांकमा यस्तो देखिएको हो । 

राष्ट्र बैंंकले हरेक महिना देशको वर्तमान आर्थिक तथा वित्तीय स्थितिको प्रतिवेदन सार्वजनिक गर्छ । सो प्रतिवेदनमा पढाइसहित अन्य विभिन्न कामले नेपालीहरू बिदेसिँदा ६१ अर्ब ४९ करोड खर्च भएको जनाइएको छ । यो गत वर्षको भन्दा २१ प्रतिशतले बढी हो । गत वर्षको सोही अवधिमा ५० अर्ब ८३ करोड रुपैयाँ मात्रै बिदेसिएको थियो । 

यस्तै, विदेशबाट नेपाल आएका पर्यटकले भने सोही अवधिमा ४७ अर्ब ५८ करोड खर्च गरेका छन् । यो अघिल्लो वर्षको भन्दा ९.५ प्रतिशतले बढी हो । अघिल्लो वर्षको सोही अवधिमा विदेशीहरूले नेपाल आएर ४३ अर्ब ४६ करोड रुपैयाँ खर्च गरेका थिए । 

राष्ट्र बैंकको तथ्यांकअनुसार पर्यटनका लागि नेपालबाट बाहिरिने रकम भित्रिने रकमभन्दा १२ अर्ब ३० करोडले बढी छ । अघिल्लो वर्ष भने २ अर्ब ४५ करोड मात्रै बढी थियो ।