मोरङकाे जाेगबनी नाकाबाट नेपाल प्रवेश गर्न लागेका एकजना बंगलादेशी नागरिकलाई भारततिरै फर्काइएको छ। नेपाल-भारतको सीमा नाका जोगबनीबाट
मंगलबार दिउँसो सवा १ बजे प्रवेश गर्न खोजेका बंगलादेशी नागरिकलाई फर्काइएको जिल्ला प्रहरी कार्यालय मोरङले जनाएकाे छ ।

प्रहरीले भारतबाट अनधिकृत रूपमा प्रवेश गर्दै गर्दा बंगलादेश टाङगाई पुराबरी बस्ने ४६ वर्षीय उत्तम सरकारलाई फेला पारेकाे थियो। जिल्ला प्रहरी कार्यालय मोरङका एसपी नवराज कार्कीले भने, ‘बंगलादेशको राजनीतिक अवस्थापछि केन्द्रबाट हामीलाई सतर्क रहन निर्देशन भएको थियो। त्यसअनुसार कडाइ गर्दा एकजना प्रवेश गर्न खोजेको पायौँ । हामीले उनलाई पुन: भारतमै फर्काएका छौँ।’

बंगलादेशी नागरिकहरू प्रवेश गर्नसक्ने भन्दै सीमामा प्रहरी र सशस्त्र प्रहरी बलले सुरक्षा बढाएको छ। सशस्त्र प्रहरी बलले फौज समेत बढाएको छ।