काठमाडौं– उपराष्ट्रपति नन्दबहादुर पुन बुधबारदेखि लैनचौरस्थित समाज कल्याण परिषद्को कार्यालय रहेको भवन (ग्रिनहाउस)मा सरेको उनको सचिवालयले जानकारी दिएको छ । यसअघि उनी गैह्रीधारास्थित सरकारी निवासमा बस्थे । 

अन्तर्राष्ट्रिय श्रमिक मजदुर दिवसको अवसर पारेर उपराष्ट्रपति पुन नयाँ भवनमा सरेका हुन् । सरकारले गत वर्ष कल्याण परिषद्को कार्यालय रहेको भवनलाई उपराष्ट्रपतिको कार्यालय तथा निवासका लागि (उपराष्ट्रपति भवन) सञ्चालनमा ल्याउने निर्णय गरेको थियो ।

उक्त भवनलाई ‘ग्रिनहाउस’नामाकरण गरिएको पुनको सचिवालयले जानकारी दिएको छ । उपराष्ट्रपति भवनको मर्मतको काम बाँकी रहेकाले कार्यालय भने केही दिनपछि मात्रै सर्नेछ । 

यसअघि उपराष्ट्रपतिको निवास र कार्यालय फरक–फरक स्थानमा भएकोमा अब एकै स्थानमा हुनेछ । उपराष्ट्रपतिको कार्यालय हाल निर्वाचन आयोगको भवनभित्रै रहेको छ ।