युवा स्पिनर नरेन साउदको घातक बलिङमा सुदूरपश्चिम रोयल्सले नेपाल प्रिमियर लिग (एनपिएल) मा लगातार दोस्रो जित निकालेको छ । दोस्रो जित निकाल्नेक्रममा सुदूरपश्चिमले बिहीबार काठमाडौं गुर्खाजलाई ७३ रनले हरायो ।
पहिलो खेलमा सुदूरपश्चिमले विराटनगर किंग्सलाई ९० रनले हराएको थियो । काठमाडौंले भने तेस्रो खेलमा निकै खराब प्रदर्शन गर्यो । आफ्नो तेस्रो खेलमा सुदूरपश्चिमले दिएको १ सय ६८ रनको लक्ष्य पछ्याएको काठमाडौं १५.५ ओभरमा ९४ रनमै अलआउट भयो ।
उसका लागि स्टीफन एस्किनाजीले ३७, सुमित महर्जनले १४ तथा जेराड इरास्मस र भीम सार्कीले १०/१० रन जोडे । बाँकी ब्याटरले भने दोहोरो अंकमा समेत रन बनाउन सकेनन् ।
काठमाडौंलाई सस्तैमा अलआउट गर्नेक्रममा मंगलबार मात्र यू–१९ एसिया कप खेलेका युवा स्पिनर नरेन साउदले सानदार बलिङ गरे । उनले ३.५ ओभरमा १९ रन दिएर सर्वाधिक ५ विकेट लिए ।
यस्तै, अविनाश बोहराले दुई तथा सैफ जैब र ब्रान्डन म्याकमुलेनले एक/एक विकेट हात पारे । त्यसअघि कीर्तिपुरस्थित त्रिवि मैदानमा टस हारेर ब्याटिङको मौका पाएको सुदूरपश्चिमले निर्धारित २० ओभरमा ६ विकेट गुमाएर १ सय ६७ रन बनायो ।
उसका लागि ब्रान्डन म्याकमुलेन र कप्तान दीपेन्द्र सिंह ऐरीले उत्कृष्ट प्रदर्शन गरे । म्याकमुलेनले ३६ बलमा चार छक्का र तीन चौकासहित सर्वाधिक ५३ रन बनाए ।
यस्तै, ऐरीले २५ बलमा तीन चौका र दुई छक्काको सहयोगमा ४३ रनको पारी खेले । उनले पहिलो खेलमा २४ बलमा अविजित ५७ रन बनाएका थिए । ऐरीले आफ्नो लय आज पनि कायम राखे ।
यस्तै, विनोद भण्डारीले ३५ र सैफ अलि जैबले ११ रन जोडे । काठमाडौंका लागि राशिद खानले दुई, जेहार्ड इरास्मस, साहब आलम र कप्तान करण केसीले एक/एक विकेट लिए ।
यो जितपछि सुदूरपश्चिम अंक तालिकाको दोस्रो स्थानमा उक्लिएको छ ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
