काठमाडौँ– राष्ट्रिय जनता पार्टी नेपालले संविधान संशोधनबारे सरकारको स्पष्ट धारणा नआए संसद अवरोध गर्ने चेतावनी दिएको छ । प्रतिनिधिसभाको मंगलबारको बैठकमा राजपा सांसद महेन्द्र राय यादवले संविधान संशोधनबारे सरकारको धारणा माग गरेका हुन् । 
 
सो विषयमा आफूहरुले विगतका अधिवेशनदेखि माग उठाउँदै आएको र सभामुखले समेत त्यसमा दुईपटक रुलिङ गरेको यादवले स्मरण गराए । उनले गिरिशचन्द्रलाल नेतृत्वको प्रतिवेदन र नेपालगञ्ज घटनाको प्रतिवेदन सार्वजनिक गर्न सरकारले पुनः रुलिङ गर्नुपर्ने माग राखे । 
 
यी विषयलगायत संविधान संशोधनबारे पनि स्पष्ट धारणा नआए बाध्य भएर संसद अवरोध गर्न बाध्य हुने उनको चेतावनी थियो । सभामुखले रुलिङ गरे पनि सरकारले त्यसको सुनुवाइ नगरेको भन्दै यादवले आपत्ति जनाएका हुन् । 

बैठक सुरु हुनेबित्तिकै राजपाका सांसदहरु उठेर विरोध गरेका थिए । त्यसपछि सभामुख महराले यादवलाई धारणा राख्न अनुमति दिएका थिए । यावदको पार्टीका तर्फबाट माग राखेपछि सभामुख कृष्णबहादुर महराले राजपाका मागबारे पुनः सरकारको ध्यानकर्षण गराएका थिए ।