Sun, 12 Jul, 2020


बंगालमा भाजपाको अनपेक्षित लहरपछि ममताले लेखिन्– जित्नेहरुलाई बधाई, तर हार्नेहरु हरुवा होइनन्
फरकधार / जेठ ९, २०७६

नयाँ दिल्ली– भारतमा लोकसभा निर्वाचनको मतगणना जारी छ । मुख्यमन्त्री ममता बेनर्जीको तृणमूल कांग्रेसको पकडक्षेत्र पश्चिम बंगालमा यसपटक प्रधानमन्त्री मोदीको भाजपाले दमदार उपस्थिति देखाएको छ । सन् २०१४ को चुनावमा केवल २ सिट जितेको भाजपाले यसपटक १७ सिटमा अग्रता लिएको छ । 



ममता बेनर्जी प्रधानमन्त्री मोदीका कट्टर आलोचक हुन् । चुनावी अभियानका क्रममा समेत यी दुई नेता एकअर्काप्रति निकै कठोर र अनुदार देखिएका थिए । आफ्नो राज्यमा भाजपाको अनपेक्षित लहर देखिएपछि कोहीबेरअघि ममताले ट्विट गरेर ‘जित्नेहरुलाई बधाई’ दिएकी छिन् ।

ट्विटमा उनले ‘हार्नेहरु पनि हरुवा नभएको’ उल्लेख गरेकी छिन् । सत्तारुढ दलले इलेक्ट्रोनिक भोटिङ मेसिनमा गडबडी गर्न सक्ने सन्देह प्रकट गर्दै आएकी ममताले पछिल्लो ट्विटमा समेत आफ्नो सन्देहको झल्को दिएकी छिन् । ‘हामीले पूरा समीक्षा गर्नुछ । त्यसपछि हामी आफ्नो दृष्टिकोण सबैसामु प्रस्तुत गर्नेछौँ,’ ममताले लेखेकी छिन्, ‘पहिले मतगणना सकियोस् र भिभिपिएटीसँग म्याच गर्ने काम पूरा होस् ।’

भिभिपिएटी अर्थात् भोटर भेरिफाएबल पेपर अडिट ट्रायल भारतमा पहिलोपटक प्रयोगमा ल्याइएको पद्दति हो, जसले इलेक्ट्रोनिक भोटिङ मेसिनबाट प्राप्त मतगणनाको नतिजालाई पेपर स्लिपसँग मिलान गर्छ । यसले भोटिङ मेसिनमा कुनै गडबडी भएको भए त्यसलाई पत्ता लगाउँछ । 


फरकधारमा प्रकाशित कुनै समाचारमा तपाईंको गुनासो भए हामीलाई news@farakdhar.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक ट्विटरमा पनि जोडिन सक्नुहुन्छ ।


यस विषयसँग सम्बन्धित समाचार

यो सामाग्री सेयर गर्नुहोस्


यो पनि नछुटाउनुहोस्