एजेन्सी– लोपोन्मुख गैंडाको प्रजाती सुमात्रान गैंडाको भविष्य अब संकटमा परेको छ । मलेसियामा भएको यो प्रजातीको एक मात्र भाले गैंडाको निधन भएको त्यहाँका अधिकारीले बताएका छन् ।

कुनै समय यो गैंडा एसियाका विभिन्न ठाउँमा पाइन्थ्यो । तर, अहिले यो गैंडा सुमात्रा वरपर मात्र पाइने र ३० देखि एक सय वटामात्र यस्ता गैंडा हुनसक्ने अनुमान छ । 

त्यसमा पनि टाम नाम दिइएको अन्तिम भाले गैंडाको निधन सोमबार भएको बताइएको छ । अब मलेसियामा यही प्रजातीको पोथी गैंडा इमानमात्र रहेको बताइएको छ । 

सोमबार निधन भएको टाम चाहिँ ३० वर्षको भएको अनुमान थियो । टामलाई सन् २००८ देखि मलेसियाको आरक्ष केन्द्रमा राखिएको थियो । उसबाट सन्तान जन्माउने प्रयास गरिएको थियो तर ती दुवै प्रयास असफल भएका थिए ।

अहिले विश्वमा पाँच प्रजातीका गैंडा पाइन्छ । यीमध्ये तीन प्रजातीका गैंडा एसियामा पाइन्छ भने दुई प्रजातीका गैंडा अफ्रिकामा । 

टामको मृत्युको घोषणा गर्दै मलेसियन अधिकारीले टामको मृत्यु बुढो भएकाले हुनसक्ने अनुमान गरेका छन् ।