चितवन– १५ जेठमा स्थानीय नेपाल कम्युनिस्ट पार्टीका नेता प्रकाश कँडेललगायतले बन्दै गरेको गौतमबुद्ध अन्तर्राष्ट्रिय क्रिकेट रंगशालाको पर्खाल भत्काइदिएपछि बन्द भएको निर्माण कार्य सुरु भएको छ ।
शनिबार विहान रंगशाला निर्माणस्थलमा स्थानीय, विभिन्न संघसंस्थाका प्रतिनिधि, राजनीतिकर्मीलगायतले भत्काइएको बार उठाउँदै रंगशाला निर्माण अगाडि बढाउने वातावरण मिलाएका हुन् ।
यसअघि वरपरको पर्खाल नै भत्काएपछि असुरक्षा हुँदै भन्दै निर्माणकार्य स्थगित गरिएको थियो । शनिबार विहान धुर्मुस सुन्तली फाउन्डेसनका अध्यक्ष सीताराम कट्टेल धुर्मुस, नेकपा चितवनका अध्यक्ष यमबहादुर परियार, नेपाली कांग्रेस चितवनका सभापति जीतनारायण श्रेष्ठ, भरतपुर महानगरपालिकाकी मेयर रेणु दाहाललगायत व्यक्तिहरु रंगशाला निर्माणस्थलमा पुगेका थिए ।
रंगशालामा सबै प्रतिनिधिहरुसँग कुरा गर्दै फाउन्डेसनका अध्यक्ष सीताराम कट्टेल धुर्मुसले भने, ‘मैले गलत बोलेको छैन, गलत वा बनावटी कुरा गरेको भए म यही मैदानमा झुन्डिन तयार छु । म यहाँ नै झुन्डिएर आत्महत्या गर्छु ।’
उनले त्यहाँ आफूहरुले कहिल्यै नराम्रो गर्नेबारे नसोचेको र रंगशाला बन्दा सबैलाई फाइदा नै पुग्ने विचार आफूले लिएको बताए । उनले भने, ‘यहाँ म मेरो घर बनाउन आएको होइन, यो रंगशाला बन्दा यहाँकै व्यक्तिहरुलाई फाइदा हुने हो, म त एउटा पाहुनाजस्तो मात्र हुँ ।’
उनले रंगशालाको पर्खालमा डोजर चलाइनु विकासमाथि नै प्रहार भएको पनि बताए ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
