एजेन्सी– भारतको नयाँ दिल्लीका मुख्यमन्त्री तथा आम आदमी पार्टीका नेता अरविन्द केजरीवालले दिल्लीमा डिटिसी तथा क्लस्टर बस तथा मेट्रोमा महिलाहरुका लागि निःशुल्क यात्रा गराउने घोषणा गरेका छन् ।
केजरीवालले यो योजना दुई देखि तीन महिनाभित्र लागु गर्ने बताएका छन् । उनले टिकट काटेर यात्रा गर्न चाहने महिलाले पनि यात्रा गर्न सक्ने तर पछि त्यो टिकटको खर्च दिल्ली सरकारले व्यहोर्ने बताएका छन् ।
अरविन्दले यो कुरा दिल्ली मेट्रोमा बताइसकेको र उसले यसको तयारी सुरु गरेको पनि बताएका छन् । दिल्ली सरकारका अनुसार यसले वर्षेनी ७ सयदेखि ८ सय करोड भारतीय रुपैयाँ खर्च हुन्छ । यसको जिम्मेवारी आफूहरुले लिने केजरीवालले बताएका छन् । उनले टिकट खरिद गरेर यात्रा गर्न सक्ने महिलाले टिकट खरिद गर्दा यसको लाभ टिकट किन्न नसक्ने महिलाहरुलाई पुग्ने भएकाले त्यसमा ध्यान दिन पनि अनुरोध गरेका छन् ।
दिल्लीका सरकारी बसमा प्रत्येक दिन ४० लाख मानिस यात्रा गर्छन् । यीमध्ये ३० प्रतिशत महिला भएको अनुमान छ । दिल्लीका उपमुख्यमन्त्री मनीष सिसोदियाले यो फैसलाले महिलाको सुरक्षाका लागि पनि प्रोत्साहन हुने विश्वास लिएको बताएका छन् ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
