वासिंगटन– नीतिपरिवर्तनको माग गर्दै गत नोभेम्बरमा भएको कर्मचारी आन्दोलनको नेतृत्व गरेकी क्लेयर स्टाप्लेटनले गुगल छाडेकी छिन् । उनले बुधबार नै कम्पनी छाडे पनि खबर भने शुक्रबार मात्रै बाहिरियो ।
क्लेयर यु–ट्युबमा म्यानेजर थिइन् । २००६ को नोभेम्बरदेखि यु–ट्युब गुगलको स्वामित्वमा छ । राजीनामापछि क्लेयरले गुगल अधिकारीहरुमाथि आफूसँग बदलाको भाव राखेर व्यवहार गरेको आरोप लगाएकी छिन् ।
१२ वर्षदेखि गुगलमा कार्यरत क्लेयरले गत नोभेम्बरमा कर्मचारीहरुले गरेको ‘वाकआउट’को नेतृत्व गरेकी थिइन् । त्यतिखेर ५० देशका २० हजार कर्मचारीले यौनशोषणका मामलासँग जुझ्ने गुगलको नीतिविरुद्ध प्रदर्शन गरेका थिए ।
कर्मचारी आन्दोलनकै कारण गुगलले आफ्नो नीति परिवर्तन गर्नुपरेको थियो । कम्पनीले यस्ता मामलामा अनिवार्य मध्यस्थताको सर्त खारेज गरेको थियो । अर्थात्, यौनशोषणको पीडामा परेका कर्मचारी कम्पनीको मध्यस्थताविनै सोझै अदालत जान पाउने भएका थिए ।
‘विभागका अधिकारीहरुले मेरो छवि व्याभिचारीको जस्तो बनाइदिएका थिए,’ शुक्रबारको एक पोस्टमा क्लेयरले लेखेकी छिन्, ‘यसैका कारण मेरा लागि नेकरी गर्न, र अर्को जागिर खोज्न पनि मुस्किल भयो । यदि म अझै त्यहाँ रहन्थेँ त मेरो पीडा झन् बढ्ने थियो ।’
सार्वजनिक रुपमा गुगलले आफ्नो प्रशंसा गरे पनि अधिकारीहरुले निरन्तर बदलाको भावले आफ्ना खिलाफ काम गरेको क्लेयरले बताएकी छिन् । आफ्नो ओहदा घटाएर कुनै स्वास्थ्य समस्या नभइकनै जबर्जस्ती ‘मेडिकल लिभ’मा पठाएको क्लेयरको आरोप छ ।
गुगलले भने क्लेयरको आरोपमाथि अनुसन्धान गरेको, तर त्यस्तो कुनै व्यवहार भएको प्रमाण नभेटिएको बताएको छ । यतिन्जेल गुगलमा काम गरेकोमा क्लेयरलाई धन्यवाद दिँदै कम्पनीले उनको उज्ज्वल भविष्यको कामना गरेको छ ।
i left google and here's my goodbye note 💛 https://t.co/RP4jFzEu6B
— claire stapleton (@clairewaves) June 7, 2019
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।