पर्वत– मनसुन सक्रिय भएसँगै राष्ट्रिय गौरवको आयोजना मध्यपहाडी लोकमार्गको पर्वतखण्डमा निर्माण कार्य रोकिएको छ । मनसुनका कारण काम गर्न अप्ठ्यारो भएको र कामदारसमेत रोपाइँका लागि घरतर्फ गएपछि एक महिनाका लागि काम रोकिएको लोकमार्ग आयोजना कार्यालय पर्वतले जनाएको छ । 

आयोजना प्रमुख आशिष थापामगरले भदौ पहिलो हप्तासम्मका लागि लोकमार्ग विस्तारको काम रोकिएको बताए । ‘बाटो बन्द भएमा खुलाउनेबाहेक अरु काम हुँदैन,’ थापा मगरले भने, ‘अरु काम मौसमले गर्न दिएन ।’ उनले बर्खामा काम गर्दा गुणस्तर पनि नहुने र जोखिम पनि हुने सुनाए । 

अहिले वर्षा भइरहेकाले ठाउँ–ठाउँमा पहिरो जाने समस्या देखिएको छ । सडक अवरुद्ध भएमा तत्काल खुलाउनका लागि जनशक्ति र उपकरण भने तयारी अवस्थामा राखिएको छ । 

यो खण्डमा अहिलेसम्म भौतिक प्रगति ५५ प्रतिशत भएको आयोजना कार्यालयले जनाएको छ । सदरमुकाम कुश्मा बजार क्षेत्रको चार किलोमिटरबाहेक अन्य खण्डमा कालोपत्र गर्ने सबै संरचना तयार भएको छ । करिब दुई किलोमिटर खण्ड कालोपत्रे भइसकेको छ ।

पर्वतसहित बाग्लुङ, म्याग्दी र मुस्ताङका बासिन्दासमेत यही लोकमार्ग हुँदै आवातजावत गर्दै आएका छन् । दैनिक सयौँ सवारी चल्ने सडकमा अधिकांश स्थानमा पहिरो खस्ने समस्या देखिएको छ ।