धनगढी– पछिल्लो समय नेपाली समाजमा आफन्तबाट नै हुने हत्या हिंसाका घटना बढिरहेका छन् । फेरि एउटै यस्तै समाचार कैलालीबाट आएको छ, जहाँ छोराले आफ्नै बाबुको हत्या गरेका छन् । 

धारिलो प्रहार गरि उनले बाबुको हत्या गरेका हुन् । यो घटनामा उनले आमामाथि पनि प्रहार गरेका थिए । आमा गम्भीर घाइते भएको प्रहरीले जनाएको छ ।

घटना हो, घोडाघोडी नगरपालिका ११ को । ५५ वर्षका छोरा उदे रावतले बाबुमाथि धारिलो हतियार प्रहार गरेका थिए । आइतबार राति उनले बाबुलाई प्रहार गरेपछि आमा जोगाउन आएकी थिइन् । तर, आक्रमणमा ७५ वर्षका बाबुको घटनास्थलमा नै मृत्यु भयो भने आमा गम्भीर घाइते भएकी छिन् । 

यो आक्रमणको कारण घरायसी विवाद भएको प्रहरीले पारम्भिक अनुसन्धानमा देखाएको छ । बाबुको हत्यापछि भाग्न खोजेका उदे रावतलाई चाहिँ प्रहरीले आइतबार राति नै पक्राउ गरेको छ ।