Sun, 22 Sep, 2019


हिसिलाले बाबुरामको नाममा थपिदिइन् आफ्नो थर– बाबुराम भट्टराई यमी
फरकधार / भदौ १८, २०७६

काठमाडौं– नेपालमा सामाजिक सन्जाल चलाउने नेताको सूचीमा पहिलो नम्बरमा नै पर्छन्, पूर्वप्रधानमन्त्री डा. बाबुराम भट्टराई । त्यसैले माइक्रो ब्लगिङ साइट ट्विटरमा उनले लेखेका विषय निकै छिटो चर्चाको विषय बन्छन् । ती विषयमाथि आलोचना हुन्छ, टिप्पणी हुन्छ र कतिपय विषय समाचारका ‘ठूला’ हेडलाइन समेत बन्छन् ।



बाबुरामपत्नी तथा पूर्वमन्त्री हिसिला यमी पनि पछिल्लो समय ट्विटरमा सक्रिय देखिन थालेकी छिन् । 

बुधबार चाहिँ यमिले ट्विटरमा एउटा तस्वीर राखेर त्यसको क्याप्सन लेखेकी छन्, जुन अहिले चर्चामा आएको छ । 

यो सन्दर्भ हो, बाबुरामका बाबु भोजप्रसाद भट्टराईको ९० औं जन्मदिनको । 

९० औं जन्मदिनमा आएका अथितिहरुलाई बिदाई गरेपछि हिसिला, बाबुराम र बाबु भोजप्रसादले एउटा फोटो खिचेछन् । त्यही फोटो ट्विटरमा राख्दै हिसिलाले क्याप्सन लेखेकी छिन्– ससुरा बुवाको ९० बर्ष प्रवेशको उपलक्षमा आउनु भएका सबैलाई बिदाई गरी सके पछि हामी ससुरा भोज प्रसाद भट्टराई, छोरा बाबुराम भट्टराई यमि र बुहारी हिसिला यमि भट्टराई !

उनले बाबुराम भट्टराईको नामको पछाडि यमि जोडेपछि उनको पोस्टमा निकै धेरै प्रतिक्रिया आएका छन् । कतिले त यसलाई निकै आश्चर्यका साथ हेरेका छन् । 

युवराज पौडेल नामबाट ट्विटर चलाउनेले पोस्टमा नै हिसिलालाई सोधेका छन्, कसरी ?

हिसिलाले पनि उनलाई जवाफ दिन भ्याएकी छिन्– अझ प्रगतिशिल हुन बाँकी छ, यति कुरा चाहिँ बाबुराम भट्टराईबाट सिक्नुहोस्, फ्रि अफ कस्ट । 

निरन नामका एक प्रयोगकर्ताले चाहिँ दुवैले आआफ्ना मामाघरतिरको पनि थर जोडेर अझ प्रगतिशिल बन्ने हो कि भन्ने प्रश्न सोध्दै व्यंग्य गरेका छन् । 

यो विषय यतिकैमा सकिएको छैन । 

यो ट्विटको चर्चा त झन् किन बढेको छ भने यसलाई बाबुराम भट्टराई आफ्नो धारणासहित रिट्विट गरेका छन् । 

रिट्वट गर्दा बाबुराम भट्टराईले लेखेका छन्– 

हिसिलाजीको सूक्ष्म व्यंग्यमा दम छ१केही रूढीवादीले वहाँको नाम पछाडि अनधिकृत ढंगले पतिको थर जोड्नथालेपछि पतिले पनि किन पत्नीको थर नजोड्ने ? भन्नु स्वाभाविक हो१ विवाह गर्दैमा gene परिवर्तन हुन्न,त्यसैले गोत्रसूचक थर फेर्नुपर्दैन ! सन्तानमा आमाबाबु दुवैको gene हुनाले उसको संयुक्त थर हुनसक्छ !

बाबुराम भट्टराईको यो ट्विटमा झन् धेरैले कमेन्ट गरेका छन् । तर, अधिकांश कमेन्ट चाहिँ बाबुराम भट्टराईको अभिव्यक्तिको आलोचनामा गरिएका छन् । 

के विवाह गरेपछि पत्नीले मात्र होइन, पतिले पनि थर फेर्नु तपाईंलाई ठिक लाग्छ ? 

यस विषयमा तपाईंको विचार लेख्नुहोस् र हाम्रो इमेल news@farakdhar.com  मा पठाउनुहोस्, त्यसलाई हामी प्रकाशन गर्नेछौँ ।
 


यस विषयसँग सम्बन्धित समाचार

यो सामाग्री सेयर गर्नुहोस्


यो पनि नछुटाउनुहोस्