रुपन्देही– रुपन्देहीको रोहिणी गाउँपालिकामा गोली प्रहारबाट एक व्यक्तिको हत्या भएको छ । अज्ञात समूहले चलाएको गोली लागेर ३५ वर्षीय महेन्द्र कुर्मीको मृत्यु भएको हो । 

जिल्ला प्रहरी कार्यालय रुपन्देहीले जनाएअनुसार कुर्मीले हिमालयन बैंक भैरहवाबाट रकम निकालेर जाँदै गरेको अवस्थामा उनको हत्या भएको हो । ओमसतिया गाउँपालिका–५ का स्थायी बासिन्दा कुर्मीलाई अज्ञात समूहले रोहिणी गाउँपालिका–३ वैकुण्ठपुरमा गोली हानी हत्या गरेको प्रहरीले बताएको छ।

अहिले प्रहरी घटनास्थल पुगेर अनुसन्धान सुरु गरेको छ । उनले बैंकबाट झिकेको रकम लुट्नकै लागि आपराधिक समूहले हत्या गरेको अनुमान छ ।  घटनाको विस्तृत विवरण आउन बाँकी रहेको प्रहरीले जनाएको छ ।