न्युयोर्क– भारतीय विदेशमन्त्री एस जयशंकरले पाकिस्तानलाई ‘टेररिस्तान’ भनेका छन् । अमेरिकाको न्युयोर्कमा एसिया सोसाइटीको एक कार्यक्रममा जम्मु–कस्मिर मुद्दामा बोल्दै जयशंकरले छिमेकी देश पाकिस्तानलाई आतंकी भूमिको उपमा दिएका हुन् । 

‘हामीलाई पाकिस्तानसँग वार्ता गर्न कुनै समस्या छैन, तर हामी टेररिस्तानसँग वार्ता गर्न सक्दैनौँ । त्यो लामो समयदेखि आतंकको गढ बनिरहेको छ,’ पाकिस्तानसँग वार्ताको सम्भावनालाई नकार्दै जयशंकरले भने ।

भारत र पाकिस्तानबीच जम्मु–कस्मिरको विषयमा सात दशकदेखि विवाद चलिरहेको छ । २० साउनमा भारतले आफूप्रशासित जम्मु–कस्मिरलाई दिइआएको विशेष राज्यको दर्जा खारेज गरेपछि भने समग्र भारत–पाक सम्बन्ध तनावको उत्कर्षमा छ ।