काठमाडौं– २० असारमा मर्जरमा जाने सहमति गरेका ग्लोबल आइएमई बैंक र जनता बैंक नेपाललाई आपसमा गाभिन नेपाल राष्ट्र बैंकले सैद्धान्तिक सहमति दिएको छ । अब, तीन महिनाभित्र यी दुई वाणिज्य बैंकले मर्जर पूरा गरी एकीकृत कारोबार थाल्नुपर्नेछ । दुवै बैंकले मर्जरको तयारी तीव्र पारेको बताएका छन् । 

मर्ज हुँदा ग्लोबल आइएमई र जनताको सेयर स्वामित्वको अनुपात १०० ः ८५ हुनेछ । मर्जरपछि बन्ने बैंकको नाक ग्लोबल आइएमई नै रहनेछ । सिइओ भने जनता बैंकका परशुराम कुँवर रहनेछन् । ग्लोबल आइएमईका कार्यवाहक सिइओ महेश ढकाल डेपुटी डेपुटी सिइओ बन्नेछन् । 

एकीकृत बैंकको अध्यक्षमा ग्लोबल आइएमई ग्रुपका अध्यक्ष चन्द्र ढकाल रहने सहमति भएको छ । सञ्चालक समितिको भने टुंगो लागेको छैन ।

हाल ग्लोबल आइएमईको चुक्ता पुँजी १० अर्ब ३१ करोड ५ लाख छ । जनता बैंकको चुक्ता पुँजी ८ अर्ब ७ करोड रुपैयाँ छ । मर्जरपछि बन्ने बैंक पुँजीका हिसाबले देशकै ठूलो बैंक हुनेछ ।