काठमाडाैं– सत्तारुढ दल नेपाल कम्युनिस्ट पार्टी (नेकपा)ले कात्तिक १० गतेभित्र उपनिर्वाचनका लागि उम्मेदवार सिफारिस गर्न जिल्ला तथा प्रदेश कमिटीलाई निर्देशन दिएको छ । प्रतिनिधिसभा, प्रदेशसभा तथा स्थानीय तहमा रिक्त रहेका स्थानमा आगामी १४ मंसिरमा उपनिर्वाचन हुने यसअघि नै तय भएको छ ।

१४ मंसिरमा प्रतिनिधिसभामा रिक्त रहेको एक स्थान, गाउँपालिका र नगरपालिकाहरुमा रिक्त रहेका ५१ पदमा निर्वाचन हुँदैछ । 

नेकपाका प्रवक्ता नारायणकाजी श्रेष्ठका अनुसार बालुवाटारमा आज बसेको सचिवालय बैठकले यस्तो निर्देशन दिएको हो । उनले प्रतिनिधिसभा र प्रदेशसभा उपनिर्वाचनका लागि निर्वाचन क्षेत्रको कमिटी र जिल्ला कमिटीलाई तीन(तीन जनाको नाम कात्तिक १० गतेभित्र केन्द्रमा सिफारिस गर्न भनेको बताए । 

नेकपाको सचिवालय बैठकले पार्टीको संगठन विभागमा तीन सदस्य थप्ने पनि निर्णय गरेको छ । संगठन विभागमा अष्टलक्ष्मी शाक्य, भानुभक्त ढकाल र हरि अधिकारीलाई थप गर्ने निर्णय भएको हो । यसअघि संगठन विभागमा वामदेव गौतम प्रमुख र जनार्दन शर्मा प्रभाकर उपप्रमुखका रुपमा थिए ।