काठमाडौं– गैर आवासीय नेपाली संघ (एनआरएनए)को नयाँ नेतृत्व चयनका लागि हायात होटलमा मतदान प्रक्रिया सकिएको छ । मतदान प्रक्रिया सकिएपछि पनि त्यहाँ विवाद भने रोकिएको छैन । 

मतगणना सुरु हुँदा दुई पक्षबीच चर्को विवाद भएपछि प्रहरीले त्यसलाई हस्तक्षेप गरेको थियो । एक प्रत्यक्षदर्शीका अनुसार मतगणनामा अध्यक्षका प्रत्यासी कुल आचार्यलाई मतगणनास्थल जान रोक्न खोजेपछि विवाद बढेको हो । 

नाराबाजी र प्रदर्शन चर्कने देखेपछि प्रहरीले हस्तक्षेप गरेको थियो । प्रहरीले लाठीचार्ज गर्दा केही एनआरएनएका प्रतिनिधिहरु घाइतेसमेत भएको ती प्रत्यक्षदर्शीले बताएका छन् ।

एनआरएनएको नयाँ नेतृत्वमा कुल आचार्य वा कुमार पन्त कसले जित्नेछन् भन्ने चाहिँ शुक्रबार साँझसम्म थाहा हुने अपेक्षा गरिएको छ । पहिले बुधबार गर्ने भनिएको मतदान विद्युतीय मतदानमा नगएपछि बिहिबार विहानबाट मतपत्रका आधारमा सुरु भएको थियो ।