काठमाडौं– संसद् सचिवालयकी कर्मचारीलाई बलात्कार प्रयास गरेको आरोप लागेका निवर्तमान सभामुख कृष्णबहादुर महरामाथि जबर्जस्ती करणी उद्योगमा मुद्दा चलाइने भएको छ । सरकारी वकिल कार्यालयले महरामाथि जबर्जस्ती करणी उद्योगमा मुद्दा चलाउने निर्णय गरेको हो ।

सरकारी वकिल कार्यालयले महरा सार्वजनिक पदाधिकारी भएकाले उनीमाथि डेढी सजाय हुनुपर्ने माग गर्ने निर्णय पनि गरेको छ । प्रहरीले महरामाथि अनुसन्धान गरी कैद तथा जरिवाना हुनुपर्ने निष्कर्षसहितको प्रतिवेदन शुक्रबार बुझाएको थियो । 

महरालाई मुलुकी फौजदारी संहिता २०७४ को बलात्कार प्रयाससम्बन्धी कसुरमा कैद तथा सजायको माग अनुसन्धान प्रतिवेदनमा गरिएको थियो । मुलुकी अपराध संहितामा जबरजस्ती करणीमा पीडितको उमेर हेरेर सजाय तोक्ने प्रावधान छ ।

पीडित महिला १८ वर्ष वा सोभन्दा बढी उमेरकी भए पीडकलाई सात वर्षदेखि १० वर्षसम्म कैद सजाय हुने व्यवस्था छ । जबर्जस्ती करणी उद्योग मात्र गरेको भए त्यसको आधा सजाय हुने व्यवस्था मुलुकी अपराध संहितामा छ । 

महरालाई त्यसको आधा सजाय अर्थात् साढे तीनदेखि ५ वर्षसम्म सजाय माग दाबी गर्न सकिन्छ । महरा सार्वजनिक पदाधिकारी भएकाले डेढगुना सजाय थप हुन सक्छ । करणी उद्योगमा साढे तीनदेखि साढे पाँच वर्षसम्म कैद हुन्छ। डेढी भएकाले साढे सात वर्षसम्म कैद हुन सक्छ ।