काठमाडौं– नवनियुक्त श्रम रोजगार तथा सामाजिक सुरक्षामन्त्री रामेश्वर राय यादवले वैदेशिक रोजगारीलाई व्यवस्थित गर्ने प्रतिबद्धता जनाएका छन् । बिहीबार मन्त्रालयमा पदभार ग्रहण गर्दै उनले युवाहरूलाई गर्वका साथ वैदेशिक रोजगारीमा जाने अवस्था निर्माण गर्ने बताए ।
समृद्ध नेपाल र सुखी नेपालीको सपना पूरा गर्न वैदेशिक रोजगारीलाई व्यवस्थित गर्नुपर्ने औँल्याउँदै मन्त्री यादवले भने, ‘वैदेशिक रोजगारीका बेथिति र विकृतिहरू समाप्त गर्छु ।’
वैदेशिक रोजगारीको सिलसिलामा कुनै पनि किसिमको भ्रष्टाचार र अनियमितता हुन नदिने बताउँदै मन्त्री यादवले विदेश जाँदा पनि गौरव महसुस गर्नसक्ने वातावरण बनाउने नीति अवलम्वन गरिने आश्वासन दिए ।
सञ्चारकर्मीसँग कुरा गर्दै उनले धेरै युवालाई विदेश पठाएर सफल श्रममन्त्री बन्ने सोच नभएको र बाहिर बसेकालाई पनि देशमै ल्याएर रोजगारी दिने वातावरण बनाउने दाबी गरे । ‘मेरो प्रतिबद्धता त्यो हो, सकभर बाहिर जानु नपरोस् जानेहरू पनि गर्वका साथ जान पाऊन्’, मन्त्री यादवले भने, ‘जुनसुकै मूल्य चुकाउन तयार छु ।’
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।