काठमाडौं– एआइएमआइएमका नेता तथा लोकसभा सांसद असदुद्दीन आवैसीले भारतमा पारित भएको नागरिकता संशोधन विधेयकबारे कडा टिप्पणी गरेका छन् । उनले यसका कारण भारत इजरायल हुने र भारतमा चर्को भेदभाव हुने प्रतिक्रिया दिएका छन् । 

भारतको समाचार एजेन्सी एएनआईलाई उनले भनेका छन्, ‘नागरिकता संशोधन विधेयकले भारतलाई इजरायलजस्ता देशमा ल्याइदिन्छ जुन विश्वमा नै सबैभन्दा धेरै भेदभाव भएको देश हो ।’

ओवैसीले यो कानुनले भारतको संविधानको अनुच्छेद १४ र २१ को पनि उल्लंघन गर्ने दाबी गरेका छन् । नयाँ कानुनले धर्मको आधारमा नागरिकता दिँदा समस्यामा परिने उनले बताएका छन् । 

यो विधेयक बुधबार भारतको केन्द्रीय मन्त्रिमण्डलले हरियो झन्डा देखाएको छ । यसलाई आगामि साता संसदमा पेश गरिने बताइएको छ ।

यो विधेयकमा छिमेकी देशबाट शरणका लागि भारत पुगेका हिन्दु, जैन, बौद्ध, सिख, पारसी तथा इसाई समुदायका मानिसहरुलाई भारतीय नागरिकता दिने प्रावधान छ ।