काठमाडौं– प्रहरीले ६५ लाख भारतीय रुपैयासहित तीनजनालाई कैलालीबाट पक्राउ गरेको छ । पक्राउ परेकाहरुले सो रकम भारतको नयाँदिल्लीबाट चोरी गरी ल्याएको खुलेको छ ।
जुन रकम नेपाली १ करोड २ लाख रुपैयाँबराबर हो । उनीहरूको साथबाट प्रहरीले थप एक लाख नेपाली रुपैयाँ पनि बरामद गरेको छ ।
प्रहरीले बाजुरा बुढीगंगा नगरपालिका १, डुंग्रीका २९ वर्षीय जहरसिंह थापा, २८ वर्षीया मनाकुमारी खड्का र ३२ वर्षीया विन्दाकुमारी थापालाई पक्राउ गरेको हो । उनीहरुमध्ये जहर र मनाकुमारी भारतमै रोजगारी गर्दै आएका थिए ।
उनीहरूले उक्त रकम नयाँदिल्लीका विशाल अग्रवालको घरबाट चोरी गरेको पत्ता लागेको छ । रकम चोरिएको बारे भारतीय दूतावासले नेपाल प्रहरीलाई जानकारी गराएपछि प्रहरीले खोजी गरेको थियो ।
खोजीका क्रममा प्रहरीले कैलालीको गौरीगंगा नगरपालिकास्थित विन्दाकै घरभित्रबाट सो रकम फेला पारेको थियो । उनीहरुले घरभित्र टिनको बाकसमा पैसा राखेर खाल्डो खनेर गाडेका थिए ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।