एजेन्सी– अमेरिकामा बढ्दो कोरोना भाइरस संक्रमणका कारण आम नागरिकलाई प्रवेश निषेध गरिएको सर्वोच्च अदालतले अब यो महिनाभर कुनै सुनुवाई नगर्ने भएको छ । कोरोना भाइरस संक्रमण पछि अमेरिकी सर्वोच्च अदालत बन्द हुन लागेको हो । 

यो अमेरिकामा सर्वोच्च अदालत बन्द भएको एक शताब्दिभन्दा पछाडि हो । यसअघि सन् १९१८ मा पनि सर्वोच्चले केही समय सुनुवाई नगर्ने बताएको थियो ।

यो निर्णय सुनाउँदै गर्दा सर्वोच्च अदालतले स्पेनिस फ्लू हुँदा सन् १९०० को दशकमा र येलो फिभर हुँदा १८ औं शताब्दिमा पनि बन्द भएको सुनाएको थियो । 

त्यहाँका अधिकांश न्यायाधीश पचास वर्षभन्दा माथिका भएका र यो समूहमा झन् धेरै कोरोना भाइरसको संक्रमण हुनसक्ने भन्दै यो निर्णय गरिएको हो ।

सर्वोच्चमा अहिले अमेरिकी राष्ट्रपति डोनाल्ड ट्रम्पविरुद्धको करसम्बन्धी मुद्दा र अन्य महत्वपूर्ण विषयमा सुनुवाई भइरहेको थियो ।