एजेन्सी–  अहिले विश्वभर कहर मच्चाइरहेको कोरोना भाइरसका कारण अब छिट्टै विश्वभर कन्डमको अभाव सिर्जना हुने अनुमान गर्न थालिएको छ । कन्डमको विश्वको सबैभन्दा ठूलो उत्पादकले उत्पादन बन्द गरेसँगै यो डर निम्तिएको बिबिसीमा उल्लेख गरिएको छ । 

कारेक्स बर्हाडका मलेसियामा भएका तीन उद्योगमा अहिले कन्डम उत्पादन रोकिएको छ । यो १० दिनदेखि बन्द भएपछि अहिले विश्वमा एक करोड कन्डम कम भइसकेको जनाइएको छ । कम्पनीका सिइओ मिहा कियाटले समाचार एजेन्सीहरुलाई बताएअनुसार अब कम्पनी कहिले खुल्छ भन्ने एकिन छैन ।

विश्वमा पाइने पाँचमध्ये एक कन्डम उत्पादन गर्ने यो कम्पनीले अहिले मलेशियाली सरकारसँग आफूहरुलाई खोल्न अनुमति दिन अनुरोध गरेको छ । अहिले मलेशियामा कोरोना भाइरस संक्रमणका कारण लकडाउन गरिएको छ । 

मलेशिया दक्षिण एशियामा सबैभन्दा बढी प्रभावित देश हो । त्यहाँ २१ सय जनाभन्दा बढीमा कोरोना संक्रमण देखिएको छ भने २६ जनाको मृत्यु भइसकेको छ ।

यसबीच मिहा कियाटले अहिले पनि माग पहिलेको भन्दा बढी भएको तर उत्पादन नै बन्द भएकाले भविष्यमा बर्बादीको समय आउनसक्ने बताएका छन् ।