एजेन्सी– सन् २००२ मा जब आमिर खानले पहिलो विवाहलाई सम्बन्धविच्छेद गर्ने निर्णय गरे, तब एउटा हल्ला फैलियो– उनले अभिनेत्री प्रिती जिन्टासँग गुपचुप विवाह गरिसकेका छन् । रीना दत्तसँग भएको आमिरको सम्बन्धविच्छेदमा प्रितीलाई दोषी पनि देखियो ।

तर, प्रितीले यसबारे लामो समयसम्म केही बोलिनन् । अब चाहिँ उनले यसबारे खुलेर कुरा गरेकी छिन् । उनले सिमी ग्रेवालको च्याट सोमा यसबारे बताएकी हुन् । 

‘आमिर मेरा राम्रा साथी हुन्, मेरो मनले भन्छ कि हामीबीच अत्यन्त राम्रो वर्किङ रिलेसनसिप होस्,’ उनले भनेकी छिन्, ‘जब आमिर खानको जीवनमा केही नराम्रो भइरहेको थियो, म नै आमिरसँग अत्यन्त नजिक थिएँ । अचानक मानिसहरुले मलाई मिसेस आमिर खानसमेत भने । मैले त्यति बेला सबैलाई भन्दै आएँ, म विवाहित होइन । मैले आमिरसँग विवाह गरेकी छैन ।’

यतिमात्र होइन, प्रितीको अर्का अभिनेता सन्जय दत्तसँग सम्बन्ध रहेको पनि चर्चा सुनिएको थियो । यसबारे पनि उनले मुख खोलेकी छिन् । उनले भनेकी छिन्, ‘म सक्ड भएकी थिएँ, म सन्जुलाई माया गर्छु, बाल्यकाल देखि नै उसलाई माया गर्छु । तर, ऊसँग मेरो सम्बन्ध रह्यो भन्ने कुरा बाहिर आउँदा मलाई निकै नराम्रो लागेको थियो ।’