एजेन्सी– विश्व स्वास्थ्य संगठनका प्रमुख टेड्रोस अधानोम घेब्रेयेससले कोरोना भाइरसबारे अहिलेसम्म जाने बुझेका सबै तथ्यहरु फरक पर्न सक्ने बताएका छन् । जेनेभामा आज भएको मिडिया ब्रिफिङमा उनले अहिले यो भाइरस नयाँ भएकाले यसबारे अध्ययन गर्ने काम भइरहेको र अहिलेसम्म डब्लूएचओले निकालेको निर्देशनहरु पनि फेरिन सक्ने बताएका छन् । 

आम मानिसमा यसको प्रकोप नफैलिओस् भन्नका लागि अब झन् फरक उपायहरु आउन पनि सक्ने उनले बताएका हुन् । ‘यो अत्यन्त नयाँ भाइरस हो र हामीले यसबारे सिकिरहेका छौँ,’ उनले भनेका छन्, ‘यो महामारी हो, यसले देखाउँदै जाने कुराबाट हामीले सिक्दै जाने हो ।’

‘हामीले जे सिकिरहेका छौँ,’ उनले भनेका छन्, ‘त्यो यही भाइरसको कारणबाट सिकिरहेको छौँ र यो प्रक्रिया निरन्तर चलिरहने छ ।’