एजेन्सी– अमेरिकी राष्ट्रपति डोनाल्ड ट्रम्पले अब अमेरिकामा कोरोना भाइरससँग लड्नका लागि जरुरी मेडिकल उपकरण तथा औषधी लगभग सकिएको स्वीकार गरेका छन् । 

अमेरिकामा अहिले सबै प्रान्तका गर्भनरहरुले आफूहरुलाई सुरक्षा उपकण, टेस्टिङ किट्स तथा भेन्टिलेटर कमी भएको बताउँदै केन्द्र सरकारसँग यसको माग गरिरहेका छन् ।

तर, सरकारी अधिकारीहरुले नै अहिले अमेरिकामा कोरोना उपचारका लागि अत्यावश्यक सबै सामाग्री सकिएको बताउँदै आएका छन् । वासिङटन पोस्टमा छापिएको एक समाचारअनुसार अब अमेरिकामा यी सामानहरुको माग निकै बढेको छ । 

अर्कोतिर ट्रम्पले यी सामानहरुको खरिदका लागि चीन र रुससँग कुराकानी भएको बताउन थालेका छन् । तर, पत्रिकाले चाहिँ उनले यी सामान किन्ने निर्णय गरेको भन्दा पनि प्रयास गरेको दाबी गरेको छ । 

यसबीच अमेरिकामा ६ महिनाका एक बच्चाको कोरोना भाइरस संक्रमणका कारण निधन भएको छ । अहिलेसम्म कोरोनाका कारण सबैभन्दा कम उमेरका व्यक्तिको निधन नै ती बच्चा हुन् ।